مدونة بوديمتنسوش الطبقة يا بهايم
مفيش حاجة اسمها "أمريكا"
مفيش حاجة اسمها "الخليج"
مفيش حاجة اسمها "مصر"
زهقت من كتر ما بقرأ "تحليل" سياسي من ناس كبيرة وعاقلة ومثقفة بيتجاهل الطبقة. وحاسس اني هتجنن كمان شوية وامشي احدف الناس بالطوب في الشارع. أول علامات تجاهل التحليل الطبقي وعلاقته بالشئون السياسية هي ان حد يتكلم عن "بلد" ككتلة واحدة، طبعا ممكن يكون في ناس بتستخدم إسم البلد كنوع من الاختصار بدل ما يقول "حكومة أمريكا" أو "نظام أمريكا" بس هي كتير بتبقى علامة مهمة.
طب ليه دين أم الطبقة مهمة؟ علشان اهتمامات الأشخاص ومسئولياتهم والله العظيم بتختلف بناء على انتمائهم الطبقية وعلى البيئة المحيطة بيهم. الطبقة الحاكمة الأمريكية علشان بتوصل للسلطة عن طريق ديموقراطية نيابية فعندها مسئولية تجاه منظومة الانتخابات (مش الشعب والفرق بين الاتنين كبير) وعندها مسئولية تجاه رأس المال وممثلية شركائهم في الحكم. أنا عايز اكسب الانتخابات علشان طموحاتي الشخصية اللي هيحققها لي طبقتي مش الشعب اللي هينتخبني (ممكن نقعد نحكي كتير عن قد ايه الديموقراطية النيابية دي هجص ابن وسخة ولا بتخلي الشعب يختار ولا خراء بس ده موضوع تاني).
نفس الشئ بينطبق على دول الخليج ومصر وإيران. في طبقة حاكمة برضو بس بتوصل للسلطة بنظام مختلف، وفي شعب بطبقاته له مصالحه المختلفة، ساعات فعلا النظام الحاكم مصلحته بتتفق مع مصلحة الشعب (لما بيخافوا من انتفاضة شعبية مثلا، لما بيبقى في مصلحة اقتصادية هتفيد الاتنين، لما القائد يحس ان نهاية حياته قربت فيفكر في تخليد نفسه بالعطايا والإنجازات، إلخ) لكن الأصل إن كل واحد بيحارب علشان طبقته.
لما نفهم مركزية الطبقة وانتمائاتها هنراجع كتير من تحليلنا للقرارات اللي بياخدها ممثلين الطبقات دي. بدل ما تقول إن الخليج هيتعلم من غلطته وهيشوف ان مصلحته مش مع أمريكا وإن التحالف مع أمريكا جاب له الخراب، هتفهم إن مصلحة الطبقة الحاكمة في الإمارات مازالت مع النظام الأمريكي علشان أمريكا عندها قدرة أكبر على حماية الطبقة الحاكمة الإماراتية (حمايتهم أمنيا كأفراد من محاولات الانقلاب أو الاغتيال، واقتصاديا كمؤسسات).
أعتقد ان خلال السنتين اللي فاتوا كان مهم لأمريكا وإسرائيل توضيح قدراتهم التقنية والعسكرية على التتبع والاغتيال للأفراد عن بعد. ده نوع جديد من الحرب مكانش متاح قبل كده، هجوم البيجر كان Demo واغتيال نصر الله واسماعيل هنية كانوا Demo أكتر من إنهم كانوا مهمين استراتيجيا. بنقول لحكام المنطقة دي اننا آه مهزومين اقتصاديا قدام الصين لكن لسه قادرين نحميكم أو نقتلكم.
وطبعا لما بنتكلم عن الطبقة ممكن ننزل لتحت شوية ونتكلم عن الأفراد المنتمين للطبقة دي وهل عنده صفات مشتركة عامة زي مثلا انهم عنصريين ولاد قحبة؟ ان الطبقة الحاكمة الأمريكية دي شايفين العرب والفرس شوية حيوانات ميستحقوش الحرية وإنهم ولا يرتقوا لإن يتم معاملتهم زي الأسياد البيض أو يعيشوا في رخاء شبههم؟
هل عندك شك إن واحد زي بيت هيجسيث أو ترامب أو بايدن مقالش قبل كده "ايه المشكلة لما يعيشوا في خيام لاجئين، مهم متعودين" لما بيتكلموا عن قصف مباني مدنية في إيران أو لبنان أو غزة؟
أنا مش هتعاطى مع أي حد متصور ان الطبقة الحاكمة الأمريكية دي عايزة حريات أو ديموقراطية بأي شكل في أي بلد في المنطقة علشان ده مستوى من الغباء خارج حدود أعصابي. طبعا هم عايزين ديموقراطية وليبرالية وحرية في إيران ولبنان وسوريا اللي أغلبية شعوبهم عندها استعداد تجوع بس تاخد بتارها من إسرائيل... طبعا طبعا.
أي مشاريع للطبقة الحاكمة الأمريكية في المنطقة بتاعتنا هيكون أساسها معادي لحرية الشعوب في تقرير مصيرها.
الطبقة الحاكمة الأمريكية في أزمة، والاتجاه من أول إدارة بايدن واضح، بدل ما تحل الإمبراطورية الأمريكية هتحاول تستولي على أي موارد تقدر توصل لها. مننا أو من أمريكا الجنوبية (غالبا هتتجنب آسيا) وده مش هيتغير بتغيير الحزب الحاكم في أمريكا دلوقتي فربنا يسترها علينا كشعوب (وطبقات حاكمة على فكرة) وينفخ في صورة حكامنا يبطلوا يخافوا من الدرونز الأمريكية شوية.