مدونة بوديالبضن على التاريخ
في يناير سنة 2022 حصل انقلاب عسكري في بوركينا فاسو أطاح بالحكومة المدنية بحجة فشل الدولة في مكافحة الجماعات الجهادية اللي نشطت في بوركينا فاسو ومالي، كعادة أي انقلاب عسكري مبارك الجماهير نزلت الشوارع تحتفل وترحب بالسلطة الجديدة واتشال الرئيس واتعين رئيس مؤقت وحكومة مؤقتة ولكن زي ما البروفيسور جبر سر الختم علمنا "إنه الانقلاب بييجي عليه انقلاب تاني عادي يعني" في شهر سبتمبر من 2022 حصل انقلاب على الانقلاب بحجة فشل الانقلاب الأولاني برضو في مواجهة الإرهاب وجالهم رئيس عسكري أكثر عسكرية من الرئيس الأولاني، القائد إبراهيم تراوري.
مكنتش مهتم أوي باللي بيحصل في بوركينا فاسو وقتها علشان مش جديد، عادي بلد أفريقي آخر تفتأه الانقلابات والقادة الملهمين. لكن في لحظة ما عدى قدامي فيديو لابراهيم تراوري وهو بيتكلم عن إرث توماس سانكارا فأنا اتخضيت! هو لسه في قادة عسكريين في دول الجنوب بيعرفوا يقروا وعندهم آيديولوجيات أو بيعرفوا يجيبوا ناس بيعرفوا يقروا وعندهم آيديولوجيات يكتبوا لهم؟!؟
رحت دورت وراه أكتر ولقيته ديكتاتور عسكري كلاسيكي جدا، يعني كمثال بسيط الراجل راح لم المعارضين وبتوع حقوق الإنسان ومحطهمش في السجن، لا ده رماهم على الجبهة علشان يحاربوا الإرهاب. يخرب بيت أمك جاي من الستينات طازة!
وقاعد يتخانق خناقات حركات التحرر من الاستعمار وإنهاء السيطرة الفرنسية على أفريقيا (هو نسي بس وهو بيتحالف مع روسيا ضد الإمبريالية الغربية ان المعسكر الشرقي مبقاش ماركسي بس يالله مش مهم) ومتأثر بالقومية الأفريقية يعني عامل حالة معمر قذافية ناصرية بامتياز.
من أسبوع كده حصلت محاولة انقلاب فاشلة تاني (المرة دي غالبا بمباركة أمريكية وانا الحقيقة زهقت من الفشل الأمريكي في الانقلابات حول العالم السنين اللي فاتت دي بجد، ال CIA بقت عرة أوي بس ده موضوع تاني) وده جابلي تسائل كده هو بعد 3 سنين من حكم ابراهيم تراوري لبوركينا فاسو عمل ايه بالديكتاتورية العسكرية دي؟ الحقيقة انه ولا بشع أوي ولا حلو أوي، عمل مشروع لتطوير الزراعة والاكتفاء الذاتي للغذاء، بيصرف على التعليم والصحة، رشد الإنفاق الحكومي منغير تقشف، أعاد التفاوض مع شركات التعدين الغربية اللي بتنهب البلد ووصل لاتفاقات أكثر عدالة وأقل فسادا، وطبعا عمل لنفسه لجان إلكترونية بتنصب على الشعب وتفهمه ان القائد سدد كل ديون البلد الخارجية وبوركينا فاسو بقت أول دولة أفريقية مستقلة مع إن البلد لسه مديونة عادي زي ما هي.
أي نظام حكم له مميزات وعيوب، يعني لو اتكلمنا كفنيين الديموقراطية النيابية مهياش الخير المطلق والديكتاتورية هي الشر المطلق، حتى الانقلابات مش دايما حاجة وحشة ولا الثورات دايما حاجة كويسة (كنت بتنقط أوي في 2013 لما بشوف ناس متعلمة بتتخانق خناقات ثورة دي ولا انكيلاب؟ بدل ما تحلل الوضع وصل لكده ليه ونخرج منه ازاي، يالله الحمد لله مصر عبر التاريخ مبتلاة بإنتيليجينسيا عندها الصفرا)
وانا بقرأ مزيج من أخبار اللجان الإلكترونية البوركينية والصحافة الغربية عن حصاد حكم ابراهيم بمناسبة الانقلاب الجديد، افتكرت فكرة قديمة عن ازاي كل الأمم ملهاش مسارات حتمية ولكن في سيناريوهات متنوعة بتتغير وتتطور بناء على متغيرات كتير، حصل انقلاب عسكري مدعوم شعبيا، مين القائد بتاعه؟ حصلت انتفاضة شعبية، السلطة هتتعامل معاها ازاي وايه التنظيمات اللي هتنتج عنها؟ وغيرها وغيرها من المتغيرات الكتير جدا، فكل أمة مسارها بيتغير ويتشكل بناء على المتغيرات دي، علشان كده الناس الكبارة العاقلة بترفض تقول توقعات لإن مستحيل ان أي حد يكون عارف بالظبط ايه قيمة المتغيرات كلها في المعادلة اللي قدامنا.
في أمم بقى بييجي حظها ان كل المتغيرات في المعادلة تبقى بنت قحبة فيبقى المسار اللي رايحة فيه ابن وسخة مدمر لكل الأطراف فالنتيجة لا يمكن تتوصف في أي تحليل نقدي غير بالبضن على التاريخ.
بحبك يا مصر يا وسخة❤️