BooDy's HomePage

بيقول لك في اتنين طلبة ثانويه عامه انتحروا السنه دي بسبب صعوبة الامتحان. مش قادر أحدد موقفي بصراحه هل أنا متغاظ و هفرقع ولا عاوز اروح اقتل أهالي العيال دي ولا اربط على كرشي حزام ناسف و اروح افجر لجنة امتحان باللي فيها ولا عاوز اضحك. الأهالي بيقنعوا ولادهم ان نجاحهم أو فشلهم في النظام الدراسي المصري هو اللي بيحدد مستقبلهم، و العيال بتصدق و بيقتنعوا ان فعلا حياتهم يا هتتدمر يا هتبدأ بعد ثانويه عامه.

أنا أهلي كانوا كده، طلعوا عيني في ثانوي و كانوا فاكرين انهم لما يضغطوا علي و يقنعوا نفسهم اني لما بقفل على نفسي أوضتي 8 ساعات في اليوم ببقى آل يعني بذاكر. ربنا يخليهم لي يا رب مكانش حد فيهم بياخد باله ابدا من الكتاب اللي بقرى فيه مكتوب فيه ايه اصلا ولا الكراسه اللي ماسكها و بكتب فيها كنت بحل فيها معادلات رياضه ولا بكتب جواب غرامي (كنت مراهق و بحب عقبال أملتك يا اخوي انت و هو و هي). بس انا كان حظي حلو شويه و مصدقتش موضوع الثانويه العامه ده، و علشان انا بالفطره لا بخرج ولا لي اصحاب كتير كنت ملزوق قدام الكمبيوتر بتاعي في الأوقات اللي أهلي سمحوا لي بيها و نتيجه لكده اشتغلت لأول مره في حياتي و انا عيل عندي 16 سنه، كنت بنزل آل يعني رايح الدرس و اروح اشتغل (ربنا يستر و ابوي و امي و اخواتي ميكونوش بيقروا الكلام ده، و النبي ما حد يقول لاختي الكبيره لا تبهدلني و مش منظر اتبهدل بعد السنين دي، برستيجي يا جدعان!)

الفيزيا انا مرحتش الدرس بتاعها غير أول شهر في تالته ثانوي و بعد كده عملت ماتش اعتزال و رميت المذكرات و الكراريس من الشباك و مرحتش الدرس تاني ولا مره، كنت بدل دروس الفيزيا و الاقتصاد و الاحصا بروح اقعد في انترنت كافي جنبنا و كان في كمبيوتر فيه نازل عليه visual studio و borland delphi (أيوه كنت بكتب فيجوال بيسك و دلفي، من كان منكم بلا خطيئه فليقذف أول سطر كود!) و من هذا الوكر كنت بشتغل و اسلم الشغل بتاعي و يتنصب علي بس اهو كنت بتعلم حاجه.

و حصلت الكارثه! دخلت امتحان الثانويه العامه و سقطت في الفيزيا و الرياضه، ابوي و امي قاطعوني و اخواتي نزلوا عياط و اخوي الكبير ساب شغله و جه من مصر علشان يلحق يحوش عني بدل ما يغسلوا عارهم و يتاووني (تشكر يا حج أحمد على وقفة الجدعنه دي، متأخره شويه بس معلش). و خدت بقى كل الموشحات عن النجاح في الحياه و العلاقه مع الله و ان ازاي ده حصل علشان انا بطلت اصلي و الكلام الكبير فشخ ده (كنت ملحد كليا في وقتها بالمناسبه بس برضو محدش عرف الموضوع ده لغاية دلوقتي....... *** بجد لو ابوي قرى التدوينه دي أنا هتفشخ!).

المهم دخلت الدور التاني و نجحت بالعافيه و دخلت جامعه خاصه نص كم متعلمتش فيها ولا كلمه و كان نص الدكاتره و المعيدين ولا مؤاخذه ميعرفوش سطر الكود من كوز الدره بس اهو اللي حصل، محدش ييجي يقول لي انت كنت ثري عربي و اتعلمت تعليم خاص لإني متعلمتش اي حاجه و مشتغلتش قبل أو بعد ما اتخرج بالشهاده دي لإني فعليا قليت بطاطس و صفيتها على نسخه من النسختين اللي عندي من الشهاده و مش متأكد النسخه التانيه فين دلوقتي. المهم اني علمت نفسي معظم اللي اشتغلت بيه بعد كده، و اشتغلت و انا في الجامعه و اشتغلت أول ما اتخرجت من الجامعه و لسه بشتغل لغاية دلوقتي (يادي النيله، و مديري لو شاف التدوينه دي هيقول لي انت سايب الشغل و بتكتب تاريخ حياتك و هيرفدني، علي النعمه التدوينه دي واقفه علي بخساره!).

اشتغلت كل حاجه و أي حاجه، كتبت ورق على الكمبيوتر، وقفت في مول الكمبيوتر ابيع كمبيوترات و ابرطش هاردات و انزل جمزات، اشتغلت بتاع شبكات و اشد الوصله و اركب الشبكه و الأر جي بربع جنيه و مره واحد شافني بركب شبكه افتكرني بتاع التليفونات و كان مصمم اروح معاه اشوف سلك تليفون بيتهم ماله، اديت كورسات كل حاجه و أي حاجه، اديت كورس لينكس و انا لسه متعلمه اصلا بس الناس انبسطت و اتعلمت حاجه برضو. و النهارده بشتغل في أحسن شركه في الكون OpenCraft بعمل الحاجه اللي طول عمري بحبها (لا يا اخي عرفتها لوحدك! ايوه بشتغل software developer)

المهم اني في الآخر بالمقاييس بتاعة الأهل اللي بيفشخوا ولادهم في ثانويه عامه مش فاشل، صحيح مش هاخد جايزة الدوله التقديريه قريب بس اهو عايش لوحدي و مش محتاج حاجه من حد و متهيأ لي ان ده اكتر بكتير من اللي بيحلم بيه اللي بيبهدل ابنه علشان يجيب مجموع أي كليه من اللي بيتخرجوا يشتغلوا في الحكومه علشان يقبض 100 جنيه في الشهر.

نظامنا التعليمي فاشل بكل المقاييس من أول ما الطفل بيدخل المدرسه لغاية ما يتخرج مرورا (حلوه مرورا دي؟) بكل المراحل ابتدائي، إعدادي، ثانوي، و جامعه. مفيش أي شكل من أشكال التحصيل العلمي إلا ما رحم ربي أو جزء بسيط من منظومة التعليم الخاص اللي جزء كبير منها برضو فاشل دلوقتي و إن كان أنضف شويه من التعليم الحكومي. و الأغبى كمان بقى المقاييس اللي بيتقبل بيها الطالب في أي كليه، علشان واحد زيي مثلا بيحب يكتب كود و عاوز يتعلم في كلية حاسبات و معلومات لازم يكون شاطر في الأدب و عارف كويس مدرسة أبوللو في الشعر و حافظ جغرافية بلاد الواق واق علشان درجات المستوى الرفيع في الجغرافيا اللي هي حاجات ملهاش أي دعوه بمجال الدراسه في الكليه بس لازم يجيب فيها مجموع في ثانويه عامه علشان الكليه دي عاوزه مجموع المتفوقين.
يعني نظام تعليمي فاشل لغاية ثانوي و جامعات مصريه متخلفه بتاخد بمعايير برضو فاشله و ملهاش لازمه و مبتجهزش الدارس فيها لأي حاجه بعد ما يتخرج، كل ده و برضو الثانويه العامه هي الحاجه اللي الناس بيهتموا بيها في الموسم ده من السنه و لما الامتحان جه صعب اتنين انتحروا، خلصت حياتهم قبل ما تبدأ أصلا بسبب الضغط ده. ولا يمكن العيال دول كانوا مختلين عقليا زي أي حد بيعمل اي حاجه وحشه في مصر؟
بلا ثانويه عامه بلا هباب، ارحموا عيالكم و علموهم حاجه تنفعهم بدل ما ينتحروا لما الامتحان ييجي صعب.

أقول قولي هذا و استغفر الله لي و لكم و أقم يا ابني الصلاه خلينا نغور من هنا. و تصبحوا على خير