فضفضه

Submitted by BooDy on Sat, 2006-01-07 19:44.

ناقم على البلد اللي عايش فيها و لازم اسافر لآخر الدنيا علشان الاقي شغل
ناقم على جزء كبير من الشعب بيطالب بالحريه و بيرفض إعطائها لغيره
ناقم على جزء كبير من الشعب بيرفض احتقار الخليجيين له و في نفس الوقت بيحتقر اللاجئين السودانيين
ناقم على الحكومة الدكتاتورية المقنعه بقناع من الطيبه و الديموقراطية المزيفة
ناقم على الحكومة اللي بتكافئ الفاسد و القذر و عديم الأخلاق و بتدفن الكفائة و الشرف
ناقم على وزير بيهدد بمحاسبة المسئولين عن خطأ حصل لفنانه بتشفط دهون و دلوقتي في غيبوبه و ضحايا مسرحية بني سويف دمهم راح هدر و كأنهم كلاب بل الكلاب لهم سعر أغلى
ناقم على الجيش اللي ضيع سنه من عمري مستني ورقه علشان اعرف اروح آخر الدنيا الاقي شغل و في الآخر غلط الجيش غلطه زودت كمان شهر
ناقم على شيئ و ليس شيخ اسمه محمد هدايه قبض قرشين علشان يدعم كلب الحزب الوطني في الانتخابات و بتفتح له الفضائيات ابوابها و مشايخ شرفاء آخريين بيتسائلوا في نهاية خطبة الجمعه يا ترى هيروح بيتهم ولا على امن الدولة النهارده
ناقم على كل اللي جنبي و مصرين يحولوني لنسخه منهم لأن هو ده النجاح في نظرهم
ناقم على إني لازم اضحك و بصوت عالي كمان لأني بكره شعور ان حد يحس بالشفقه تجاهي

صحيح الكلام لا بيودي ولا بيجيب لكن الفضفضه العشوائي دي بتريح شوية