Places I visit dailyMisc.
|
الزقازيق حيث اختلط الحبر الفسفوري بالدمSubmitted by BooDy on Wed, 2005-12-07 15:56.
طبعا العنوان ممكن يوحي بإن في ناس انتخبت و بعدين انضربت النهارده لكن للأسف ده مش حقيقي. الحبر الفسفوري اللي اختلط بالدم كان الحبر اللي فاضل من الجوله الأولى من اسبوع لأن النهارده محدش انتخب أصلا في الزقازيق. صحينا النهارده من بدري و نزلت انا و تامر ابن خالتي علشان نلحق نروح ننتخب قبل ما الضرب يشتغل زي الاسبوع اللي فات. وصلنا للجنة مدرسة عبدالعزيز علي التابعه للدايره الأولى بالزقازيق الساعه تسعه و نص صباحا و لقينا اللجنه مقفوله من كل النواحي بعساكر الأمن المركزي و الناس واقفين قدام اللجنه من الساعه 8 صباحا. وقفنا شوية و لما فقدنا الأمل قلنا نروح نشوف لجنة مدرسة الناصريه فيها ايه و لقينا اللجنه مقفوله و محاطه بالأمن المركزي و نفس الوضع في لجنة المعهد الفني التجاري. و احنا عند مدرسة الناصريه سمعنا هتافات الإخوان في آخر الشارع ناحية لجنة المعهد الفني التجاري فرحنا على هناك و لقينا الاخوان واقفين و في طوب كتير متكسر و مالي الشارع. و انا واقف لسه مش واخد بالي لقيت أول طوبه نازله جنب دماغي و الناس بتجري كلها فبصيت لفوق و لقيت البلطجيه النهارده متمركزين في مكان جديد و هو فوق مباني لجنة المعهد الفني التجاري. عيني عينك البلطجيه واقفين فوق اللجنه و بيحدفوا طوب و زجاجات فارغه و يقال انهم رموا قنابل مولتوف بس انا مشفتهاش. بدأ الاخوان في الرد على البلطجية اللي فوق اللجنه و البلطجية اللي في الشارع بالطوب و حتى الناس العاديين النهارده تضامنوا مع الاخوان كراهية في البلطجه و في حكومة الكلاب. اتكلمنا مع عضو في الاخوان نعرفه و قال لنا انهم صوروا فعلا بلطجيه قاعدين مع الأمن المركزي في العربيات بسلاحهم. و شفنا البلطجيه بالسيوف و السنج واقفين بين الأمن المركزي و بين اللجنه الساعه اتنين و احنا بنلف حوالين اللجنه قنابل الغاز المسيل للدموع اشتغلت مره تانيه و جرينا مع الناس في اتجاه مدرسة الناصرية بعيد عن الدخان لكن الغاز طال الكل و الناس بدأو يرموا بصل من البلكونات علينا علشان الناس تستخدمه ضد مفعول الغاز. في المواقف دي فعلا بتحس ان حتى لو كانوا اللي بيحكمونا كلاب فمازال شعب مصر أصيل و هيفضل يحارب بلطجة النظام. الساعه 3 حسيت بالاختناق بعد البصل و مازلت إلى الأن عندي صعوبه في الكلام فرجعت للبيت و هنزل تاني أحضر مؤتمر الدكتور محمد مرسي. جوز اختي توصل من كلاب الحزب الوطني إلى ان في كلمة سر لأنصار كلب الحزب الوطني خالد زردق بتتغير كل ساعتين لو قلتها لعساكر الأمن المركزي هيدخلوك اللجنه. كلمة السر الأخيره كانت "كلنا سواسيه". الله اعلم كلمة السر الحاليه ايه هنزل دلوقتي أحضر مؤتمر مرشح الإخوان الدكتور محمد مرسي |
 |
Some rights reserved
![[FSF Associate Member]](http://slashproc.net/uploader/fsfbutton.png){kind=small}
محب
اريد ان اكون صديقا وان اعرف مواعيد المؤتمرات اذا امكن
محمود
Post new comment