في ساعة صفاء قررت اتفرج على مسلسل الحشاشين علشان احاول افهم الناس قافشة على المسلسل ليه واتفرجت على كل الحلقات اللي نزلت ورا بعض وده شئ صعب علي اني اعمله لو المسلسل مش عاجبني. طبعا انا مش ناقد فني ولا اقدر أقيم العمل على أساس جودة تفاصيله التقنية، اللي بفهم فيه هو التاريخ والأدب على قدي.
أعتقد ان الناس قافشة على مسلسل الحشاشين علشان الكومبو الدولجي لكريم عبدالعزيز وبيتر ميمي أكتر من جودة المسلسل نفسه (ودي حاجة بالتأكيد تسعدني ان الناس متنساش جريمة كريم عبدالعزيز وبيتر ميمي في الختيارا(ات))، لكن بشكل موضوعي المسلسل لحد دلوقتي مفيهوش جرعة تعريص للدولة زي ما الناس بتحاول ترسم بسبب كلمة اتقالت في نص مشهد بسرعة عن إن سبب الشدة المستنصرية هو الفتن. مهو فعلا الفتن كانت سبب في زيادة قسوة الشدة المستنصرية. الخليفة وقتها استقدم والي عكا بدر الدين الجمالي (اللي الجمالية متسمية على إسمه) بجيشه علشان يفرض النظام في القاهرة ويسيطر على كتائب الجيش المنشقة. فيعني حصل خير مش أزمة كبيرة ان ده اتقال في النص سريعا لكن في نفس الوقت قالوا ان سبب الشدة هو نقص منسوب النيل.
حاسس برضو اننا ناسيين الحضيض اللي احنا عايشينه، الناس فعلا فاكرة الاسماعيلية دول مشجعين الاسماعيلي فيعني مش بطال أبدا ان يبقى في مسلسل جماهيري بكل انتقاداتنا لللغة والأداء بيعرف المواطن المصري الشائع ان في بشر مختلفين في العالم (لسه في اسماعيلية في مصر لحد دلوقتي، تصور يا مؤمن؟).
والأهم بالنسبة لي ان أخيرا بقى في دراما تلفزيونية بتتعمل عن دول في تاريخ الإسلام غير الخلافات "الرشيدة" اللي بلعوها لنا في المدرسة على أساس ان هي دي الخلافات بس وإن العالم كان أبيض واسود لحد ما الغرب الكافر هجم علينا وطفى نور الخلافة. لو دورنا ورا السلاجقة لوحدهم هنلاقي محاولات إنشاء نظام حكم متطور جدا على زمنه
لو مشكلتك مع الدقة التاريخية فمحتاجين نفتكر حاجتين مهمين: أولا دي دراما، مينفعش نتعامل مع الدراما على إنها مرجع تاريخي دقيق، مفيش عمل درامي مبني على التاريخ بيكون دقيق تاريخيا، دي وظيفة الوثائقيات مش الدراما
وثانيا الحشاشين فرقة باطنية معظم المكتوب عنها أساطير لا يمكن التحقق من دقتها، مؤسس الطائفة حسن الصباح نفسه منعرفش قبره فين غير بالشبه. فحصل خير لو في مغالطات تاريخية في سبيل الدراما.
خلونا نكمل مع المسلسل علشان لو في توجيهات بالتعريص للدولة فأكيد الجرعة هتكون أكبر بكتير من أول أربع حلقات دول، احنا عندنا مسلسلات بتقرأ بيانات النيابة والداخلية بالنص في مشاهد "درامية". فروقوا يا اخواننا التقيل لسه مجاش
ولو مهتمين تعرفوا أكتر عن تاريخ الحشاشين منغير قراءة كتير، الدحيح عمل حلقة هايلة عنهم