BooDy's HomePage

متهيأ لي مفيش حد في الكون بيحب ولاد أخوي قد جدهم، فعلا حكاية أعز من الولد ولد الولد دي صح أوي. سؤالين يطرحوا أنفسهم حاليا. الاولاني هل ملك مصر المفدى منهار دلوقتي و حاسس بألم شديد على حفيده؟ و لو حاسس بالألم و الحزن يا ترى إيه إحساسه و هو شايف النفاق و الكذب اللي بيحصل علشان كل واحد عاوز يكسب شوية نقط؟ يعني هو متعود على النفاق و الكذب دول أكيد من ساعة ما تولى الحكم في مملكته السعيده لكن النفاق المره دي باين زياده و جاي في مناسبه المفروض انها مؤلمه بزياده، يا ترى هيثور و يقول لااااااا كله إلا حفيدي حبيبي ضنايا نور عيني يا كلاب يا وحشين إهئ إهئ إهئ.

طب يمكن الصدمه تخليه ينهار و يقول انا خلاص عاوز اعتزل الملاعب و اسيب الدنيا و اللي فيها بعد ما حبيبي راح؟ ولا تبقى مصيبه لو قال انه بسبب اللي حصل عاوز يدي أكتر و اكتر لأطفال مصر و لشعب مصر؟!؟!

الولد ربنا فعلا نجده، أنا لو جدي دكتاتور و ابوي حرامي و عمي تاجر بديون مصر و بيجهز نفسه علشان يبقى دكتاتور هو كمان أكيد أكيد أكيد أحسن لي اني اموت و انا عيل صغير. ربنا يرحمه لكن اعذروني مقدرش أعزي ناس مسئولين عن موت مئات من أطفال مصر من الجوع و المرض و التعذيب. و بالمناسبه برضو، التعاطف بيبقى مع المريض لكن ساعة الموت التعاطف بيتحول لأهل الميت لإن الميت مش حاسس بيك أصلا دلوقتي يا كوتوموتو يعني بلاش خنقه بقى و حد ييجي يقولي انت آسي و معندكش قلب و كخه.

كل شعب مصر بيدعي لك من قلبه يا ملكنا انك تجتمع بمحمد ان شاء الله على خير..... و عن قريب.