BooDy's HomePage

مش أحسن حاجه تعملها و انت مخنوق انك تقعد تسترجع في ذكرياتك الحلوه أو الوحشه. تقابل قريبك أو صاحبك اللي اتربيت معاه، كل واحد فينا عنده نسخه من الشخص ده في حياته، إبن خالتك أو عمتك اللي في نفس سنك و كنتوا ساكنين جنب بعض و انتوا عيال و يمكن لغاية دلوقتي أهاليكم لسه ساكنين جنب بعض. هتفتكر لما كنتوا بتلعبوا مع بعض، لما كنتوا هتغرقوا في المصيف، أول واحده ست شفتوها و اتهبلتوا عليها في حياتكم، بنت الجيران اللي برضو كلنا عندنا نسخه منها، إلخ إلخ إلخ....
هتضربوا حجرين الشيشه و تضحكوا في الأول، هتضحكوا أوي. و أول ما الفحم ينطفي و الضحك يخلص هترجع لوقتك اللي انت فيه و تقارن زمان بالنهارده. أحلامك اللي كان نفسك فيها و اتحققت فجأه هتبقى ملهاش قيمه، هتفتكر اللي ضاع منك مع الوقت، هتفتكر كل حاجه وحشه انت عايشها دلوقتي و مكنتش عايشها زمان. هتفتكر الناس اللي حبيتهم و راحوا،هتفتكر ناس زي الزفت بتكرههم، هتفتكر أماكن كان نفسك تروحها و مرحتهاش و أماكن مكانش نفسك تقرب لها و غصب عنك عشت فيها، هتفتكر شغل بتكرهه و بتعمله برضو غصب عنك و شغل بتحبه مش قادر تروح له، هتفتكر ان لسه قدامك بدري أوي في الدنيا إذا ربنا مخدكش بسرعه يعني و انك لسه ياما هتشوف أيام أسود و أنيل من كده و هييجي يوم و برضو تقعد مع الناس اللي عايشين معاك دلوقتي و تفتكر دلوقتي و تقارن حياتك بعد عشر سنين بدلوقتي و برضو تلاقي ان أحلامك ملهاش معنى و ان ناس أكتر راحوا، و انك كرهت ناس أكتر و رحت أماكن أكتر و هربت تاني و تالت و رابع.

قال لك زمان و انا صغير كنت بحلم أبقى كبير، في ناس بقى و هي صغيره عمرها ما كانت بتحلم انها تكبر، كان أقصى حلمه انه يفضل طفل كمان شويه. يقف بيه العمر عند عشر سنين ميزيدش عن كده. لكن مفيش فايده، آل إيه سنة الحياه ان الصغير يكبر، بس سنة الحياه انه يكبر بسرعه زياده عن اللي حواليه؟ محدش عارف، كلنا فاكرين نفسنا كبرنا و فاكرين نفسنا كبرنا بسرعه لكن احنا برضو عيال في عيون اللي كبروا قبلنا، يعني هنفضل عيال على طول.

عمرك ما هتلاقي أي مقاييس تقدر تحدد بيها ان الإنسان اللي قدامك كويس أو وحش، لا دين ولا تربيه ولا أخلاق ولا مواقف مر بيها ولا طبقه اجتماعيه ولا تعليم ولا غنى ولا فقر ولا أي حاجه، البشر هيفضلوا زي البطيخه، تشتريها و تشيلها على دماغك علشان متتكسرش و تروح بيها البيت لام العيال و انت و حظك ساعة الجد يا طلعت قرعه يا طلعت لا مؤاخذه حمرا، و سيبك من اللي بيطبل على البطيخه ربع ساعه قبل ما يشتريها، كله هجص و شرفك يا بيه، مهما طبلت مش هتعرف الا ساعة الجد.

مفيش أخيب من إنك تعلق أمل على ناس، و مفيش أصعب من إن ناس يعلقوا أملهم عليك. على الأقل لما بتفشل لوحدك مبتكسرش حد، و لما بتهرب مبتخذلش حد. الوحده هي أعظم شئ في الوجود، لا بتعلق آمال على حد ولا حد بيعلق آماله عليك. نجاحك أو فشلك ملكك لوحدك و هروبك أو بقائك ملكك لوحدك و طز في كل الباقيين من الكائنات العفنه اللي بيسموهم بشر. أكيد هييجي يوم العلم فيه يتوصل لحاجه تقضي على الجوانب السلبيه للوحده و تخلصنا من التعامل مع الكائنات دي.

بيقول لك لازم نحافظ على البيئه، لازم نحافظ على البيئه و النبي يا اسيادنا. و برضو محدش فاهم ان البيئه مش محتاجه حد يحافظ عليها، البيئه هترجع نفسها تاني و الأرض هتخضر تاني بس لما تتخلص من البشر اللي هيخربوها، الموضوع هياخد عشره ولا عشرين ألف سنه و الموارد كلها هتبقى زي الفل و تبدأ سلسلة التطور من الأول تاني، و يتطوروا بشر جداد تاني و تظهر أديان و يطلعوا بشر يقولوا ان اللي بيقول اننا اتطورنا كافر تاني و حضارات و ثقافات و حروب و خراب و دمار من تاني و تخرب الأرض تاني، يعني خلاص، الحكايه كلها اننا هنموت كلنا كبشر. ما في ستين داهيه، آل يعني فينا حد يستاهل. اقطع يا عم الشجره اللي عمرها سبعين سنه في شارع المحافظه و بيعها، و انا مال أهلي مش هفتح بقي ولا هتكلم، اقطع انت الشجره على بال ما اوصل انا آخر الشارع اتفسح و احرق بنزين و اقطع شوية ورق و ارميهم و انور ألفين لمبه في حته منوره اصلا و اسيبهم و امشي. اقطع يا راجل اقطع، بلا بيئه بلا هباب، دي عالم بيئه صحيح يا أخي.

Fear is the path to the dark side. Fear leads to anger. Anger leads to hate. Hate leads to suffering.

صدق يودا، يا ترى كان ممكن أنيكن يتحكم في خوفه قبل ما يخليه يتحول و يبقى دارث فيدر.

But beware of the dark side. Anger, fear, aggression; the dark side of the Force are they. Easily they flow, quick to join you in a fight. If once you start down the dark path, forever will it dominate your destiny, consume you it will.

صدق يودا تاني، الشر سهل انه يتعمل لكن تدارك نفسك و عمل الحاجه الصح اللي ضميرك بيمليها عليك صعب أوي، الحقد و الكراهيه دافع قوي صعب التغلب عليهم. يا ترى ممكن تحتفظ بالحقد و الكراهيه جواك و برضو تعمل الحاجه الصح اللي بيمليها عليك ضميرك؟ و ياترى ينفع أصلا الضمير و الكراهيه و الحقد يتواجدوا مع بعض؟ محتاجين جزء جديد من حرب الكواكب علشان يفتي لنا في القضيه دي.

قال الشهيد مالك مصطفى رضي الله عنه: يوما ما،سندرك ان ما مضى كان مجرد استعداد لما سيأتي. وانه كان لابد من المرور في كل الاشياء لنستقبل ما ننتظره.

سألنا أحد الحكماء متى يأتي هذا اليوم فأخذ نفساً طويلا حتى أنهى حجر المعسل و أخرج الدخان ثم نظر لنا و شخر شخرة اهتزت لها السموات و الأرض و قال: و انا ايش عرف دين أمي، كل واحد يومه بييجي في معاد غير التاني، و كتير مبيجيلهمش اليوم ده أصلا، و غوروا من هنا عاوز انام يا ولاد الكلب.
إمته اليوم اللي هندرك فيه أهمية ماضينا لمستقبلنا، الله أعلم. و إن كنت أشك انه ممكن ييجي، كتير أوي الألم و المعاناه و الفرحه بتبقى بدون أي دلالات كونيه و بدون أي معنى، سعاده أو حزن لحظيين بيحصلوا و يروحوا لحالهم و خلاص.

هل نحن نغضب الله إذا ما أردنا الحياه؟ هل نغضب البشر إذا ما أردنا الموت؟ حماقة هي أن تنتظر قولا من الآخرين قبل أن تفعل و حماقة هي أن تفعل قبل قول من الآخرين.
تبا لك يا خوسيه ماريا.
دعونا نقف خمسه و اربعين ساعة حداد على ضحايا تيتانيك.
هيا بنا نقذف بزجاجات الخمر في الشوارع حتى نغرق الدنيا سكرا و ضياعا فوق ضياعها و لنحتفظ ببعض الخمر لكي نلقيه عبر الحدود تضامنا مع غزه. اللعنة على الأبراج، اللعنة على الحرب، اللعنة على كل شئ. و خبريني يا بهيه عاللي قتل ياسين يا عين.