BooDy's HomePage

صحيت النهارده على الخبر ده عند حسام الحملاوي. بسبب حلقة برنامج الحقيقه الاسبوع اللي فات عن البهائيه و اللي كان فيها خطاب تحريضي قذر من جمال عبدالرحيم ضد البهائيين تعرض بهائيين من مدينة سهاج لأعمال عنف وصلت لحرق بيوتهم.

مش جديد على جمال عبدالرحيم انه يقدم صوره لأقذر ما يمكن الوصول له من التمييز و اضطهاد الآخر و الكذب و التلفيق و استغلال جهل الناس علشان كده انا مش هقول حاجه ارد بيها عليه لإن فعلا مجادلة الكذابين مضيعه للوقت. لكن خلينا نتكلم عن رد الفعل الإسلامي القويم اللي حصل.

"إن الله يأمر بالعدل و الإحسان و إيتاء ذي القربى و ينهى عن الفحشاء و المنكر و البغي"

دي مش دباجة لخطبة الجمعه بس، متهيأ لي ان دي ممكن تكون مختصر لكل الأديان اللي ربنا نزلها علينا. إن الله يأمر بالعدل بس، مقالش انه يأمر بالعدل تجاه طائفه معينه أو عرق معين أو ديانه معينه. فين العدل في مهاجمة طائفه بناء على اتهامات مفيش لها أي دليل. سيبك من حرية العقيده و من حقوق الإنسان و الكلام ده كله لإنه برضو جدل طويل عريض و صعب ان حد يقتنع بيه و خلينا في الاتهامات اللي عادة بيوجهها الناس لأي طائفه. أول اتهام طبعا للبهائيين هو إنهم حلفاء لإسرائيل و الصهيونيه، حد من اللي هاجم بهائيين سهاج اتأكد ان الناس اللي هاجمهم فعلا بيتعاملوا مع اسرائيل أو الصهيونيه؟ حد اتأكد انهم بيعملوا على محاربة الإسلام و القضاء عليه من الداخل؟

إذا افترضنا ان من حقك انك "تدافع" عن نفسك بالطريقه الهمجيه دي مش على الأقل من حق المجتمع اللي انت عايش فيه عليك انك تدافع عن نفسك تجاه خطر حقيقي و ثابت مش بس بناء على كلام واحد صحفي طلع في برنامج في التلفزيون؟

أنا دايما حاسس اني بنفخ في قربه مقطوعه و انا بحاول اقنع حد بحرية العقيده و الأديان لكن ساعات الكلام بيجيب نتيجه، جزء كبير من اللي بيقروا المدونه دي عقلانيين و الناس اللي نفسي توصل لهم الرساله دي أغلبهم مش هيقراها هنا علشان كده عاوز أي حد بيقرى الكلام ده يفتكر الآيه دي كويس و يقولها دايما لنفسه و للناس، إن الله يأمر بالعدل.

فعلا مش عارف إذا كان في كل الأديان آيه أعظم من دي، افتكروها و انشروها بين الناس يمكن تجيب نتيجه و تحمينا من جمال عبدالرحيم و أمثاله.