يمكنك الخروج من السجن دون مقابل

Submitted by BooDy on Sat, 2009-03-07 17:38.

فاكرين لعبة بنك الحظ ولا مونوبلي؟ كان في كرت بيطلع لك يخرجك من خانة السجن منغير ما تدفع الغرامه. واضح ان في حياتنا عموما في كروت زي دي، أهمها طبعا انك مسلم. اتولدت مسلم؟ ألف مبروك، طلع لك كرت الخروج من السجن بدون مقابل طالما اللي هترتكب جريمه في حقهم غير مسلمين.

بتكلم مع الناس في إن البشير مطلوب لتهم جرايم حرب ارتكبت في دارفور. رد الفعل الأول هو إن ده جزء من المؤامره العالميه على الإسلام و المسلمين، و اشمعنى يعني البشير هو اللي عاوزين يحاسبوه؟ طب ما يحاسبوا اسرائيل الأول ولا هو علشان البشير مسلم يعني؟!؟

المشكله ان اللي بتكلم معاهم دول مكانش عندهم أي فكره عن نوعية جرايم الحرب اللي بنتكلم عنها و أصلا معندهمش فكره ولو بسيطه عن الصراع في دارفور، كل اللي شايفينه انه صراع بين المسلمين و بين قوى الظلام المفتريه الوحشه. متهيأ لي ان عقدة الاضطهاد عندنا كمسلمين بقت متضخمه أكتر من عند اليهود، المسلم برضو بريئ بعد ظهور الأدله. أول حاجه هتفكر فيها دايما كمسلم قبل ما تحاول تعرف الحقايق هي إن الكفار بيحاولوا يدمروا الضحيه المسلم اللي زيك. غريزه ربنا زرعها فينا بقى، سبحان الله.

مشكلتي دلوقتي هي ترتيب أعدائنا، طبعا المحكمة الجنائيه الدوليه بما إنها كلها كفار مش مسلمين تبقى من أكبر أعدائنا و عاوزه تبني صليب كبير أوي في السودان، بس يا ترى هما الأول ولا الشيعه؟ أصل المؤامره الشيعيه برضو شغاله اليومين دول، هي ليه موصلتش السودان؟ يكونش في اتفاقية متقي/ليفني زي سايكس بيكو كده و مقسمين المنطقه بينهم؟ مهو غالبا الموامره الشيعيه بتشتغل بالتنسيق مع المؤامره الصهيونيه العالميه اللي بتمولها إيران........ قصدي اللي بتمولها المنظمه الماسونيه.... يخرب بيت كده، انا نسيت مين بيمول مين من المؤامرات اللي على الإسلام و المسلمين. عموما انا شخصيا بحاول آخد تمويل من أوباما علشان ابدأ مؤامره صغيره و يمكن ربنا يفتحها علي و تبقى مؤامره كبيره ان شاء الله..... يادي النيله، نسيت ان أمريكا مديونه بترليون دولار للصين، طيب يبقى هروح أحاول آخد تمويل من الصين، بس معنديش بترول زي البشير علشان اديه للصينيين. مش ممكن، شغل المؤامرات ده متعب انا هرجع شغلتي الأصليه و خلاص. تصبحوا على خير


( categories: )

الفكر الضيق يا

Submitted by Lasto adri (not verified) on Sat, 2009-03-07 19:58.

الفكر الضيق يا بودى فى كل مجتمع وزمان
بس يمكن هى زيادة قوى اليويمن دول عندنا عشان معندناش حاجة تانية نعملها

الناس فاضية وغير كدة نفسها بأى شكل من الأشكال ترمى اللوم على أى حد عشان تحس بالتخلى عن المسؤولية تجاه تخلفها وفقرها وديكتاتوريتها
وعشان كدة برضو بيحبوا إنهم يشاركوا بشكل أو بآخر فى دائرة الظلم.. بيلعبوها عشان أصلا محدش عايزنها تخلص بجد!

لول.. بتفلسف كالعادة.. بس دا اللى حسيته من حواراتى مع ناس كتير.. وحاسة إن فكرنا مش ح ينضف بجد الا لو تقدمنا.. وإحنا أصلا مش ح نتقدم الا لو فكرنا نضف
:D

مافيش فايدة.. مافيش أمل
تصبح على أى حاجة عايزها


استغفر الله

Submitted by BooDy on Sun, 2009-03-08 10:57.

استغفر الله العظيم، طب انا متشائم و قلنا ماشي لكن انتي كمان، مينفعش كده
:D


لا تنس تبرئة

Submitted by Too good to sign up (not verified) on Mon, 2009-03-09 23:15.

لا تنس تبرئة الرئيس اليوغسلافى الصربى ميلوزوفيتش من جرائم حرب انسانية ضد مسلمى البوسنة فى التسعينات
ولم نر محاكمة لباراك ونتينياهو وموفاز وشارون واولمرت أو لكلينتون وبوش وتشينى وبلير أو لبوتين ويلستين وشرودر وبيرلسكونى
رغم أن جرائمهم فى فلسطين والعراق وأفغانستان والبوسنة وكشمير والشيشان كانت ولا تزال على الهواء مباشرة


أيوه و بعدين

Submitted by BooDy on Tue, 2009-03-10 11:57.

أيوه و بعدين يعني؟ إيه علاقة ده بالبشير؟ إيه علاقة ده بانتهاكات حقوق الإنسان في دارفور؟ ايه اللي دخلنا دلوقتي في ميلوزوفيتش و بوش و شارون؟


امم..اعتقد انى

Submitted by Alshaimaa Alanadoly (not verified) on Tue, 2009-03-10 12:17.

امم..اعتقد انى متفقة معاك في نقطة..و هي نظرية المؤامرة و عدم وجودها..و زي د/المسيري سماها مخطط و ليست مؤامرة..و ان اللى بيحصل ليس الا حلقة في مسلسل البقاء للاقوى و التخطيط للسيطرة على منطقة تعتبر من اثرى مناطق العالم في مواردها -الشرق الاوسط اقصد-

لا اعتقد ان في حد على وجه الارض بيديك امكانية انك تقتل مادام من تقتله ليس مسلم..
مش عارفة ان كنت رحت دارفور او لا او تعرف حد راح...لكن دارفور مش مختلفة كثير عن باقي افريقيا..
بمعنى الصراع هناك مش واخد الطابع المذهبي الرهيب اللى احنا متخيلينه..لكن اكثره صراع للبقاء في ظل انعدام توافر موارد حياتية..
بمعنى انك لو قارنت دارفور مثلا باثيوبيا و جرائمها في الصومال..فلا مجال للمقارنة..باوغندا..لا مجال
لسة كثير اماكن على الكرة الارضية بتتصارع على اماكن المياه و الموارد و حتى على خلفية الدينية او العرقية..
انا مش بقول ان دارفور مفيهاش ماساه اطلاقا..لكنها ماساه زي الموجودة في اماكن كثير و عمرنا ما سمعنا عن عرضهم قدام المحاكم الدولية...
خد عندك مثلا كشمير و جرائم الهندوس..خد عندك تايلاند..الشيشان..و اماكن تانية كثير

اعتراضنا على محاكمة البشير مش اعتراض على انه ليه الحق في انه يعمل اللى يعمله طالما الطرف التاني مش مسلم..اعتراضنا اشمعنى البشير؟..و اشمعنى دلوقتى؟ و اشمعنى بعد ما اخد مجرم البوسنة براءة؟

بس تعليق اخير..)طلع لك كرت الخروج من السجن بدون مقابل طالما اللي هترتكب جريمه في حقهم غير مسلمين.(
ممكن تقلي مكان واحد حصل فيه كدة؟
بمعنى تاني..انت يكاد يكون معظم مجازر العالم حتى الان احد اطرافها مسلم..وهو المجنى عليه..
بس حتى الان مش عندي اي معلومة عن كون الجاني هو المسلم....
لو تعرف ربنا يكرمك قلي..حتى الواحد يخرج من احساس المظلوم دوما و ابدا ده..:P

تحياتي العطرة..
شيماء الاناضولي..


أنا مش معترض

Submitted by BooDy on Wed, 2009-03-11 09:56.

أنا مش معترض خالص على إن في ظلم واقع على ضحايا كتير مسلمين، و مش معترض على إن النظام العالمي كله فاسد من أول الأمم المتحده لغاية أصغر منظمة غير ربحية تابعه ليها، لكن مش معنى كده ان لو النظام الفاسد ده عمل حاجه واحده بس صح يبقى نعترض عليها و نقول اشمعنى.

مش هبقى مستغرب لو حد قال لي ان الضغط على البشير بتحركه دول غربيه علشان النفوذ الصيني في السودان، شئ طبيعي جدا ان ده يحصل لإننا في الأول و الآخر دلوقتي لعبه في إيد القوى العظمى اللي بنتبع لها لكن برضو ده ميمنعش ان حتى لو كانت الغايه فاسده فالوسيله فيها شئ من العداله.

أما بقى ان المسلم هو الجاني تعالي نشوف جرايم تنظيم القاعده في كل حته و لسه الناس بتحبهم و بتدافع عنهم، جرايم طالبان الكتيره أوي و برضو لسه الناس بتدافع عنهم (أصلا طالبان مش بس المسلمين اللي بيدافعوا عنهم، الأنيل ان في يساريين بيدافعوا عنهم علشان بس بيحاربوا الأمريكان بس ده موضوع تاني :D)

بس عموما مش من حقك تخرجي من إحساس المظلوم ده طول ما انتي شرق أوسطيه فمتتعبيش نفسك و تحاولي :)


امم..مش الفكرة

Submitted by Alshaimaa Alanadoly (not verified) on Wed, 2009-03-11 20:51.

امم..مش الفكرة في ان النظام الدولي عمل حاجة واحده صح و احنا اعترضنا..الفكرة في اشمعنى...
بمعنى تاني..محدش فينا يقدر ينكر ان صدام عمل مجازر كثير جدا..و ان اللى عمله في العراق اسؤ مليون مرة من البشير..و انه هو من وجهة نظرنا كناشطين حقوقين يستحق اكثر من اللى حصل فيه
و مع ذلك..لا اعتقد ان فيه حد عربي قبل ان امريكا هي اللى تنفذ اللى حصل..او ان امريكا عملت ده عشان المساكين العراقيين..
الموضوع مش موضوع امم متحده او محكمة عدل و بتدور على حقوق ناس اتقتلت..الموضوع اكبر بكثير..و اعتقد اننا كمصريين اول ناس عليها انها تقلق من اللى بيحصل..
و ربنا يستر و ميبقاش السودان عراق تاني بعد شوية...

موضوع طالبان و القاعده و بن لادن..صراحة انا معرفش حد تقدر تقول انه قارئ جيد و يؤيد القاعده...اعتقد ان الجميع يعلم ان القاعدة اختراع امريكي..و انها بعد عملية المدمرة كول لم تستطع التحرك تقريبا..

بالنسبة لكوني شرق اوسطية و مش حخرج من احساس الظلم ده..فاعتقد ان دي المصيبة فعلا..:D


شاهد مؤتمر د

Submitted by Too good to sign up (not verified) on Tue, 2009-03-10 22:59.

شاهد مؤتمر د سليم العوا علي الجزية مباشر لتعرف لماذا يدافع الناس عن البشير وتأكد أنه ليس لكونه مسلم أو عربي


يا ريت بعد إذنك

Submitted by BooDy on Wed, 2009-03-11 09:58.

يا ريت بعد إذنك بس تقول لي تفاصيل أكتر عن المؤتمر ده أو تقول لي لو موجود في أي حته على الانترنت علشان معرفتش اوصل له، و شكرا.


LOL عندك خبر إن

Submitted by Mafkoud (not verified) on Sun, 2009-03-22 12:18.

LOL
عندك خبر إن سكان دارفور مسلمين ؟؟
ركز ربنا يخليك


يا عم الأستاذه

Submitted by BooDy on Mon, 2009-03-23 10:30.

يا عم الأستاذه قبلك قالت ان الصراع أساسه مش واخد الطابع المذهبي، الفكره هي إن طالما اللي عاوز يحقق العداله مش مسلم يبقى غلط و مش لازم نسمع له.

ركز انت كمان :)

صباحك فل :)


والله العظيم

Submitted by ahmed (not verified) on Wed, 2009-07-15 15:35.

والله العظيم كلامك كلو صح البشير ارتكب جرائم بحق الشعب الدارفوري وقتل واغتصب