My TwitterPlaces I visit dailyMisc.
|
يا فلسطين لا تنادي عليهمSubmitted by BooDy on Tue, 2008-12-30 00:47.
يا فلسطينُ، لا تزالينَ عطـشى وعلى الزيتِ نامتِ الصحـراءُ المفروض بما إني مصري أشعر بالخزي و العار دلوقتي، صح؟ يؤسفني إني أخيب ظن القارئ العزيز لإني سأظل دائما و أبدا فخور بإني مصري. برغم خيانة و عمالة الحكومة المصريه اللي عمري ما اخترتها و رافضها و هفضل رافضها لغاية ما تغور عننا. برغم ده برضو انا فخور اني مصري لإني ولا خنت فلسطين ولا عملت حاجه ضد المقاومه ولا هعمل، الخونه هما السياسيين و زي ما عندنا خونه كل الدول العربيه بيحكمها خونه و كلاب، زي ما عندنا حزب وطني ديموقراطي زي ما فلسطين عندها فتح. أيُّها الراكعونَ في معبدِ الحرفِ كـفانا الـدوارُ والإغـماءُ مزِّقوا جُبَّةَ الدراويشِ عـنكم واخلعوا الصوفَ أيُّها الأتقياءُ اتركـوا أولياءَنا بسـلامٍ أيُّ أرضٍ أعادها الأولياءُ؟ المفروض إني أهتف بالمجد لهنيه و لحماس و للمقاومه، صح؟ برضو يؤسفني أخيب ظن القارئ العزيز لإني يمكن لأول مره أقول يلعن أبو دي مقاومه على أبو حماس. ايه هو الغرض من المقاومه لو سمحتوا؟ الصمود؟ أنضرب ميت طلقة رصاص في جسمي و مقولش أي من الألم؟ مش الهدف الأول و الأوحد من المقاومه هو استرداد حقوق المقهورين و رد الظلم عنهم؟ فين رد الظلم عن أهل غزه بخرق التهدئه؟ و ياريت خرق التهدئه كان بعمليه عنيفه عملت رعب للصهاينه مش بشوية بمب العيد. المفروض إني أشتم إسرائيل، لا مش هشتم اسرائيل، ايه الفايده لما اشتم الكلب و أقول له "يا كلب يا إبن الكلب"؟ الكيان الصهيوني طول عمره دموي قذر و مستني أي فرصه علشان يرتكب مجازر في حق أي بشر لا ينتموا إليه. جديده يعني ان الصهاينه يرتكبوا مجزره؟ وزير حرب عاوز يحقق نصر عسكري يقدمه لشعبه بعد آخر هزيمه لآلة الحرب الصهيونيه من أبطال المقاومه الحقيقيين في 2006، وزيرة خارجيه محتاجه برضو لنصر يدعمها في الانتخابات الجايه، كيان قذر بيديره مجرمين و قتله، مستغربين ليه من اللي بيعمله؟ البطـولاتُ موقفٌ مسرحيٌّ ووجـوهُ الممثلـينَ طـلاءُ الإخوان المسلمين، ولاد مليون كلب بيهتفوا لفلسطين و بينسقوا الهتاف مع كلاب مبارك اللي خان فلسطين. أول مره ابقى فعلا عاوز انزل مظاهره لكن عارف كويس أوي إني لو نزلت هتخانق مع المتظاهرين مش مع الأمن لإني مش ههتف لحماس انا هاشتمهم و الإخوان هما اللي بينسقوا لأغلبية المظاهرات النهارده. أرجو ان مهدي عاكف يطلع راجل المره دي مش اهبل زي كل مره و يجمع مليون بني آدم فعلا و يكسر الحصار و لو اني كنت افضل انهم يجمعوا مليون بني آدم يطربقوا بيهم قصر العروبه على دماغ حسني مبارك و يقلبوا نظام الحكم. أنا ما جئتُ كي أكونَ خطيباً فبلادي أضاعَـها الخُـطباءُ معنديش خطبه عصماء أقولها و مكتئب و قرفان من كل البشر عشان كده بكتب الكلام ده. لو حماس رفعت الرايه البيضاء و طلبوا هدنه الصهاينه هيوقفوا القصف؟ معتقدش. إن الرد يكون أعنف من صواريخ حماس الفاشله؟ يمكن يكون ده الحل. يحصل حشد في كل مكان في العالم فيقوم الضغط الدولي يأثر على إسرائيل فتوقف العمليه؟ برضو احتمال يكون ده الحل. مليون مصري يكسروا الحواجز و يسمحوا لأهل غزه انهم يدخلوا مصر؟ يمكن يكون ده حل ولو انه حل الصهاينه نفسهم انه يحصل. ملعون أبو الحكومه المصريه، على أبو حماس، على أبو اسرائيل. و يسقط حسني مبارك، أقولها هنا مدام الإخوان المسلمين مش هيخلوني أقولها في المظاهره بتاعتهم. ربنا يرحمنا جميعا برحمته. |
 |
Some rights reserved
![[FSF Associate Member]](http://slashproc.net/uploader/fsfbutton.png){kind=small}
لو كنت كتبت
لو كنت كتبت بنفسي كل اللي جه في دماغي وكل مواقفي من كل الأطراف... عمرها ما كانت ح تطلع بالدقة دي
وآخر سطرين يدلوا على انك حضرت مظاهرة يوم السبت واتنقطت من تع*** الإخوان مع الأمن..
بجد.....
شكرا
بالروح بالدم
بالروح بالدم نفديكي يا فلسطين
كذااااااااابين
لن نفديها لا بالروح ولا بالدم
لأننا في نهاية اليوم سنذهب الى البيت بعد المظاهرة و نتغدى و نشاهد المسلسل العربي
سواء كان هذا المسلسل مسلسل الدماء
او اننا سنكون مللنا الدماء فنبحث عن مسلسل تركي عبيط نضيع معه الوقت
يا فلسطييييييييين لا تنادي العرب
لا نحن جيش محمد
ولا نحن سنفديكي
نحن غثاء كغثاء السيل
يا فلسطين كل ما ستناليه منا هو وقفة دقيقة حداد في بداية ماتش مهم لكرة القدم
لن نلغي برامج التلفاز لأجلك
لن نلغي سفرنا في اجازة رأس السنة لاجلك
لن نجلس في هم وكآبة لأجلك
يا فلسطين نحن ابعد ما يكون عن جيش محمد
ونحن لا يوجد في عروقنا دماء لنفديكي بها
وارواحنا بعناها للدنيا
فما عادت لدينا دماء ولا ارواح
سامحيني فلسطين..
لا املك لك الا الدعاء
و هو دعاء الذل والاستكانة
حسبي الله و نعم الوكيل فينا
حسبي الله و نعم الوكيل في جبننا
حسبنا الله و نعم الوكيل
شكرا يا بودي
شكرا يا بودي فعلا ملعون أبو المظهرات الى عليها رقابة و متنسقة مع الأمن
كلامك عن
كلامك عن الإخوان وحماس يدل علي جهلك الشديد
ولن أضيع وقتي في الحديث عن ما تفعلة المقاومة في غزة ...
أما كلامك عن المظاهرات وأنها بالتنسيق مع الأمن فسأكتفي بإبتسامة عريضة تعبر لك عما في صدري
حاول أن لا تستخدم الألفاظ البذيئة في كلامك فحديث الرسول معروف
{ إن الرجل ليتكلم بالكلمة من سخط الله لا يرى بها بأسا فيهوي بها في نار جهنم سبعين خريفا }
هذا إن كنت تؤمن بآحاديث الرسول
لا و النبي لا
لا و النبي لا انت رادد علي، و حياتك يا اخي ترد علي بدل الابتسامه العريضه السمجه اللي بتعبر عما في صدرك.
و برضو كلمني شويه منغير ما تجري على أحاديث الرسول يا اخوي.
يا اخي أحه عليك و على الإخوان
عاوز تعرف ايه
عاوز تعرف ايه اللي بتعمله المقاومة في غزة
يا خسارة أخويا(6 سنين) نايم دلوقتي لو كان صاحي كان هيرد عليك
600 صاروخ نزلو علي إسرائيل وبتقول فين المقاومة
بقي دلوقتي حماس هي اللي خرقت التهدئة !!
برضة يا خسارة أخويا نايم كان زمانه قلك مين اللي خرق التهدئة اللي كانت من طرف واحد
مش هرض علي علي الشتيمة لأن مش معني إنك شخص مش محترم أنا كمان اكون زيك وكفاية إنها دليل علي إنك الشخص المقصود من الحديث
لم أكن أتنمي أن يصل الحال بين المسلمين إلي هذا الحد
ربنا يهديك
متشكرين يا عم
متشكرين يا عم المحترم، سلم لي على أخوك أوي و على ال 600 صاروخ اللي مقتلوش ولا بني آدم لغاية دلوقتي.
و أرجو لو سمحت ترد برضو علي يا محترم في موقف الإخوان المسلمين بما إنك جاي تعرص لهم و تقول لي ازاي انهم مكانوش منسقين مع الأمن و رافضين يهتفوا ضد حسني مبارك في مظاهراتهم.
ربنا يهدينا جميعا يا اخوي
حبيبي .. مش معني
حبيبي .. مش معني إنك مش متابع الأخبار(أو جايز متابعها من التليفزيون المصري ) تيجي هنا تجرح وتغلط في الناس
في محرك بخث إسمه جوجل خش عليه وإكتب المقاومة في غزة وشوف اللي هيطلع وبعدها ابقي تعالي هنا إحكم
وحضرتك بقي إستنتجت إن الإخوان بينسقوا المظاهرات مع الأمن علشان كدة مبيهتفوش ضد حسني مبارك !!!!
أحب أقول لحضرتك إن حسني مبارك مش الهدف من المظاهرات
الهدف هو النظام بأكملة
حسني مبارك الآن مجرد دمية يحركها كبار حرامية الحزن الوطني (الحزب الوطني )
وأعتقد إن حضرتك عارف الكلام ده كويس
لك فائق إحترامي
أولا أنا مش
أولا أنا مش حبيبك يا ظريف
و الاخبار متابعهم يا خفه و مش من التلفزيون المصري، و حلو أوي حكاية النظام بأكمله دي علشان كده بتقولوا خيبر خيبر يا يهود جيش محمد سوف يعود!!! طب مدام حسني مبارك جزء من النظام كنتوا بتسكتوا اللي بيهتفوا ضده ليه؟ و محدش هتف ضد النظام ليه؟ متشتغلش نفسك و النبي و اتكلم بعقل شويه إذا كانوا لسه مغسلوش مخك.
مفيش حد ضد المقاومه لكن كلنا ضد المزايده و الاتجار بيها و أكيد ضد المقاومه الغير عقلانيه ده إذا كنتوا بتعترفوا بالعقل و فاهمين ان ربنا و شوية البمب اللي المقاومه رمتهم مش هما اللي هيدمروا الصهاينه.
لك فائق احترامي كمان يا سيدي
أخبار غزة
أخبار غزة والمقاومة
http://www.paldfmedia.net/news/
حماس = اخوان +
حماس = اخوان + سلاح = دمية فى يد ايران و حذف الله
بعد إذنك بلاش
بعد إذنك بلاش هبل يا أخ nixguy و لو عاوز تتكلم عن حزب الله عندي يبقى تحترم نفسك. حزب الله هو الحاجه الوحيده اللي مش هقبل إهانته عندي و لو زودت في الكلام صدقني مش هرد عليك بالاحترام ده
أنا مختلف مع استراتيجية حماس و رافضهم كحركه ثيوقراطيه من الأساس لكن من السذاجه اننا نقول إنهم دميه في إيد حد و خصوصا إيران فبلاش هبل و النبي.
بلاش الهبل بتاع "احنا ضد كل شئ إسلامي و خلاص علشان احنا علمانيين و جامدين أوي".
و انت بلاش هبل و
و انت بلاش هبل و سيبك من اسلوب علاء
على فكره انا مش صاحبك و قاعد معاك على القهوه عشان تكلم بالاسلوب ده مع شخص غريب, بلاش النزعه الهجومية و الاستعراض بالالفاظ لانها طريقه سهله و مش حاتثبت وجهه نظرك لاى حد بيقرا الكلام ده
حماس اعلنت بنفسها انها بتاخد فلوس من ايران
خزب الله من وجهه نظرى جايب الدمار لبلده, انت مشفتش كان بيهاجم مصر ازاى و عايز الناس تنزل تهاجم الحكومة ؟؟؟!!!
انا بستعجب ايه اللى عجبك فى حزب الله, ماهو لو حكم راجل زى ده مصر, مش حايختلف عن الاخوان كتير
ولا يمكن انت شيعى
على كل حال انت حر بس انا مستغرب
فى النهايه مع احترامى لك
مش عاجبك كلامي
مش عاجبك كلامي و اسلوبي محدش قال لك تيجي تعلق هنا. و انت أمريكا تنيك حكومتك و شعبك و محدش بيفتح بقه و جت على حسن نصر الله؟؟؟ يا اخي أحه، طب يا ريت يا اخوي الشعب يهاجم الحكومه و الله ما هزعل و متهيأ لي محدش بيحب البلد دي هيزعل، فعلا مينا ذكري قالها حكمه، الحرب دي محدش انتصر فيها غير حسني مبارك، الناس طيزهم واكلاهم أوي علشان نصر الله بيحرضهم على الحكومه، من حلاوة الحكومه يا اخوي.
حزب الله اللي بتقول عليه زي الدهلات الإخوان معندوش ذرة من الثيوقراطيه اللي عند الإخوان. حزب الله مبيدخلش معارك موازين القوه فيها مختله و يزعق بعلو حسه و يصوت و يقول الحقوني. خلاص نسينا تاريخهم علشان خطاب حسن نصر الله؟؟ ولا تكونش من اخواننا بتوع "الشيعه كخه، الشيعه بيغزوا العالم الإسلامي، الشيعه هما أعدائنا الحقيقيين، الشيعه وحشين بيلطموا و هما بيصلوا"
أنا متربي تربيه وهابيه صرف، يعني مهما حاولت أنضف دماغي هفضل طول عمري عندي مشكله مع الشيعه بالذات أكتر من أي طائفه تانيه بالرغم من إني النهارده بقول اني مليش أي طائفه و انتمائي للدين ده كله اصلا من وجهة نظر أغلب المسلمين اللي اعرفهم ملوش وجود، كافر يعني و هخش النار.
أنا دايما بقول ان حسن نصر الله هو جمال عبدالناصر بتاعي، يعني حتى لو غلط في مره برضو هدافع عنه لإنه الرمز الوحيد تقريبا اللي كبرت و انا شايفه قدامي و موقعش و متأثرش بأي حاجه علشان كده انا متحيز له فعلا لكن برضو حزب الله في رأيي هو قوة المقاومه الحقيقيه الوحيده المتبقيه دلوقتي.
و ياريت و النبي تقول لي أي مصدر لحكاية ان حماس بتاخد فلوس من إيران دي و النبي علشان أول مره اسمعها منك
مع احترامي ليك كمان يا سيدي
ما لهاش لا مصدر
ما لهاش لا مصدر ولا مخبر ولا حاجة أبدا
كل ما هنالك ان المخابرات الأمريكية مجندة شوية سلفيين ولاد ميتين كلب بحيث لو دخلت الحمام الصبح وحزقت شوية زيادة يكتبوا لك تلات اربع صفح كلها ميكس عبقري من شتايم وأحاديث وآيات وسب دين عن دور إيران الخفي في التسبب في هذا الحزق..
المشكلة اني عارف ان اغليب العيال دي كاسيتات فاضية تحط فيها الشريط يشتغل على طول.. مضحوك عليهم إن لم يكونوا هما نفسهم قابضين زي ما حصل مع ناس أعرفهم..
يا أساتذة.. يا مشايخ.. يا مفتين.. يا مطلعين ديننا.. احنا عندنا (في العالم الإسلامي) جيش أمريكي في أفغانستان والعراق وجيش أثيوبي في الصومال وقوات طوارئ في لبنان وسيناء والعراق وجيش ترررررررررررررركي في شمال العراق بيقابل بطناش عالمي ح اخصص وقت عندي للكلام عنه عندي.. وجيوش من كل ملة في العراق والسودان ده غير دولة نشعت في نص أرضنا اسمها اسرائيل.....
يعني بصلاة النبي مطالبين اننا نتغاضى عن كل الجيوش دي ونركز مع إيران اللي ما لهاش في أي دولة عربية أكتر من حبة نفوذ..؟
إتكّوا على عقولكوا واتقوا الله فينا...
Post new comment