BooDy's HomePage

هو يعني ايه ضمير و النبي؟ بصفتي راجل جاهل نفسي حد يفهمني ايه هو الضمير بالظبط؟ اللي شايفه قدامي ان الضمير تعريفه ان واحد يبقى متضايق من حاجه وحشه عملها فيحاول يحس انه انسان كويس و جميل بإنه يصلحها، مش مهم يصلحها ازاي بس المهم انه يحس انه احسن و يستريح و طز في باقي الناس. مش فاهم انا ايه الفايده اللي هترجع علي من الاعتذار؟ واحد يقول لي انت عيل واطي صحيح، ما كفايه عليك القيمه المعنويه... للأخ اللي بيقول كده اسمح لي اقول لك معنويه دي تبقى خالتك!

واحد جاي يعتذر لي عن حاجه قالها من 15 سنه و واحد تاني بعد ما غرقني يقوم رامي لي قشه و يقول لي خلي بالك حافظ عليها علشان عاوزها و النبي. و كله علشان الباشا ابو ضمير يستريح لكن مش مهم انا اتحرق بجاز وسخ لما الأولاني يفكرني بحاجه طول عمري عاوز انساها ولا التاني لما يغرقني أكتر و انا بحاول انقذ له القشايه. يا اخي جتكم الهم انت و هو على ضمايركم.

و سؤال تاني معلش، هو ليه الضمير مبينقحش على حد غير بعد سنين طويله فحت؟ انا في رأيي كله من الأفلام العربي القديمه، الناس كلها في الأفلام العربي القديمه ضميرها بيصحى بعد عشرين سنه، محدش بيعترف ببنته من الخدامه إلا بعد عشرين سنه، محدش بيرجع الأرض لاصحابها إلا بعد عشرين سنه، محدش بيسلم نفسه للبوليص (واخد بالك من "البوليص" بالصاد؟) إلا بعد عشرين سنه. طبعا في احتمال انه يسلم نفسه للبوليص لما يجي له مرض خطير كل أعراضه انه عمال يكح لحد آخر الفلم. بس غالبا الشرير في الفلم العربي مبيجيلوش الكحه دي غير برضو بعد عشرين سنه. يبقى أكيد الأفلام العربي برمجت عند الباشا ابو ضمير عداد في عقله الباطن بيشتغل بعد ما بيعمل أي حاجه وحشه و بيصفر بعد عشرين سنه.

إذا أنا من هذا المكان علشان اوفر على نفسي و على الناس لو اتضح لا قدر الله ان انا عندي ضمير بعد كده بقول لأي حد انا عملت له حاجه وحشه طز في اللي خلفوك و روح اشتكيني للي خلقك لإن الاعتذار انا شايف ان ملوش لازمه (إلا إذا كنت سجنتك و هروح اعترف للبوليص علشان انت تطلع من السجن و تتجوز آمال).

كل سنه و انتوا أزفت من اللي قبلها جتكم الهم.

ملحوظه: انا بقيت بفلتر التعليقات و مبنشرش اللي مش على مزاجي و اللي مش عاجبه يتفلق.