BooDy's HomePage

"و الست بتاعه كمان، هيجيب الديب من ديله، و يشبع كل جعان".

دي أغنية للشيخ إمام الله يرحمه و كلمات أحمد فؤاد نجم ربنا يديله الصحه و يطول لنا في عمره. فاليري جيسكار ديستان كان رئيس فرنسا في السبعينات، معلوماتي عن الفتره دي محدوده أوي لكن على حد علمي كان في نوع من التفاؤل في الشارع المصري بانتخاب فاليري و كان الناس حاطين أمل كبير و حاسين ان وصوله للحكم في فرنسا حاجه كويسه لفرنسا و لمصر و للكون كله. طبعا بما إن انا عيل صغير مواليد 1984 معشتش الفتره دي و معنديش انطباع عنها لكن مش هبقى مستفرب لو حد أكد لي الكلام ده و أكد لي ردة الفعل دي في السبعينات لإني شايفها دلوقتي في الشارع المصري بعد نجاح باراك اوباما في أمريكا.

No we can't

ده الشعار اللي العقل المفروض يقبله هنا في مصر بمناسبة انتخاب أوباما. ممكن حد يشرح لي ايه هو الفرق بين أوباما و بوش؟ أو بلاش بوش، خليها الفرق بين أوباما و بيل كلينتون بصفة ان الاتنين ديموقراطيين و الناس بتحبهم (أنا شخصيا بحب كلينتون علشان راجل زير نساء و نجس البيت الابيض لا مؤاخذه). طب فاكرين يا ولاد النص مليون طفل عراقي اللي ماتوا بسبب حصار بيل كلينتون للعراق؟

"the death of one man is a tragedy, the death of a million is a statistic"

مش فاكر انا سمعت أو قريت الكلمه دي فين فياريت لو حد عارف يفكرني، متهيأ لي ان ممكن تطبيقها على سياسات امريكا تجاهنا، نص مليون طفل عراقي؟ طز نسيناهم، دعم الديموقراطيين للكيان الصهيوني و الآلاف من الفلسطينيين اللي ماتوا؟ طز نسيناهم، تحولوا لشوية احصائيات ملهمش لازمه.

واحده من اللحظات اللي عمري ما هنساها ابدا من حوالي عشر سنين تقريبا، في يوم واحد اتقتل عدد مش بسيط من الفلسطينيين و في المقابل تقريبا حماس قتلت اتنين جنود اسرائيليين في عمليه استشهاديه، كان في نفس اليوم و خرجت علينا السيده الأولى الأمريكيه في وقتها هيلاري كلينتون علشان تنعي الجنديين الاسرائيليين اللي ماتوا النهارده و تتمنى لأهلهم القوه و الصبر، كنت عيل عندي 13 سنه ساذج شويه وقتها و متخيل ان الامريكان ممكن يكون عندهم شوية رحمه و عداله و هيقولوا حاجه عن الفلسطينيين اللي ماتوا في نفس اليوم. لكن نعوا الشهداء الأبطال الصهاينه. حد فاكر الكلام ده؟ ولا اقول لك، طز، اصل الاتنين الصهاينه دول هما اللي كانوا مأساه و الفلسطينيين اللي ماتوا في نفس اليوم هما اللي رقم في احصائيه.

ممكن حد يفهمني ايه الحاجه الجديده في اوباما غير انه اسود؟ معلش اصل انا راجل جاهل و مدعي للثقافه و بتمحك في طبقة المثقفين فبتكلم كلام كبير علي فياريت حد يفهمني ايه هو الجديد بتاعه؟
طب يا اخواننا ياللي مبسوطين بلونه سمعتوا قبل كده مصطلع بيقولوه الأمريكان على ناس سود معينين اسمه Uncle Tom؟ ده معناه بالبلدي كده للجهله اللي زي حلاتي كلب لأسياده البيض. عمركم ما سمعتوا عن واحد اسود باع العرق اللي بينتمي له علشان اسياده البيض؟
ايه اللي عمله اوباما علشان ميبقاش زنجي المنزل اللي اتكلم عنه مالكوم من سنين طويله؟
ولا حاجه.

طب راجعتوا سياسته أو تصريحاته أو أي حاجه هو قالها أو عملها قبل ما تفرحوا بيه يا شوية بهايم؟ عاجبكم لون بشرته بس؟
سيبك من سياسته الخارجيه اللي المفروض تهمنا، تعالوا نشوف سياسته الداخليه آل يعني احنا امريكان بقى و يفرق معانا، حد خد باله انه بيدعم قوانين بتنتهك حريات المواطنين؟ كمثال عملي دعمه لقانون
FISA
حد واخد باله انه بيكمل الطريق اللي بدأه بوش تجاه إيران؟ انه كان و مازال بيدعم الأغنيا الأمريكان و بيدعم السياسات اللي بتاكل حق الطبقات المتوسطه و الفقيره و انه وصل للرئاسه بنفس الوسائل الدعائيه الأمريكاني القذره؟

قال ايه بيقولوا انه اشتراكي، اسمحوا لي اقول أحه يا اشتراكيه، فين اشتراكية اوباما دي و النبي؟ دي عامله زي اشتراكية عبدالناصر كده اشتراكيه عربيه؟ في اشتراكيه اوباميه؟ ولا بلاش اجيب سيرة ناصر احسان الناصريين الدهلات ينطوا لي هنا و مش وقتهم ولا طالباهم.

اصله مخلط ابيض على كيني و عاش في ماليزيا فالراجل بيحترم الثقافات المختلفه، ده جده مسلم يا عم يعني اكيد بيحترم المسلمين، طب ماهو بوش بيحترم المسلمين، مشفتوش صورته و هو في المسجد و قالع الجزمه و ماشي بالشراب؟ و الست لورا مراته و هي لابسه حجاب و النبي ولا المسلمين الأوائل في أفلام السيره اللي بيجيبوها يوم مولد النبي. هو صحيح يعني هدم مسجد على دماغ اربعين واحد كانوا بيصلوا فيه في افغانستان علشان كان عندهم شك ان ايمن الظواهري بيطرطر في حمام الجامع بس الراجل قلع الجزمه و هو داخل المركز الاسلامي في واشنطن يبقى بيحترم الإسلام.

هل اوباما هيحاكم تشيني على أوامره المباشره بتعذيب المعتقلين؟ هل هيحاكم بوش على جرايم الحرب اللي ارتكبها؟ على هيخلي أمريكا متبقاش واحده من أكتر الدول انتاجا للأسلحه سواء كانت دمار شامل أو أسلحه خفيفه؟ هل داخليا هيحارب تكتلات المؤسسات الكبيره اللي بتدمر البيئه في العالم كله؟ هل هيوضع حد للاحتكار القذر للصناعات الدوائيه؟ شركات السجاير و الكحول؟ صناعة الحرب و الدمار على إيد شركات الأسلحه؟ شركات البترول؟ هيبطل يدعم النظم الدكتاتوريه؟ هينهي الحصار القتصادي على كوبا؟ هيوضع حد للسياسات الاحتكاريه لمؤسسات البرمجيات الكبيره؟ هل هيدي فرصه لمرشحين الأحزاب التانيه غير الديموقراطي و الجمهوري للظهور في المناظرات التلفزيونيه في الانتخابات الجايه؟

الإمبرياليه الأمريكيه كانت محتاجه لداعر جديد يحمل راية القهر و الظلم من بعد بوش، إن اختلفت السياسات فالنتيجه واحده للعالم كله، لازم النظام ينهار علشان يتصلح، لا اوباما ولا غيره هما الفرسان البيض اللي هيوصلوا في وسط القذاره دي و يصلحوا العالم. فعلا من السذاجه اختزال السياسه الأمريكيه في موقف رئيسها من اسرائيل، العمليه كبيره جدا و محتاجه كلام كتير أوي و المواضيع متشعبه و كتيره علشان كده انا هحترم أي حد هيقول لي انه متفائل بأوباما بناء على نظره عاقله و محسوبه لكل جوانب السياسه الأمريكيه، لكن ده عمره ما هيحصل لإن أي نظره عقلانيه هتوصل لنفس النتيجه ان أوباما و بوش و ماكين و كيري و كلينتون و آل جور كلهم نفس الشخص...... و إن كنت بصراحه معترف اني بحب آل جور شويه علشان نشاطه لحماية البيئه.

في الختام مفيش في ايدي غير اني اجيب بجوز جنيهات لب ابيض و اقعد على جنب اتفرج على اللي هيحصل و اتف القشر على قفا المتفائلين لما اوباما يبدأ فترة التعريص الرئاسيه بتاعته و يفشخنا كلنا.

تصبحوا على خير.