BooDy's HomePage

كل واحد عنده مجموعة معتقدات متصور انها هي الصح و اللي حواليه كلهم غلط، طول عمري عندي مشكله اني اصنف نفسي لأني عمري ما عرفت انا زي مين بالظبط، دايما كنت بعرف نفسي على إني مسلم و هويتي الإسلاميه هي حجر الأساس لشخصيتي و لحياتي عموما. "كنت ملحدا على سنة الله و رسوله" استاذنا الله يرحمه عبدالوهاب المسيري قال الكلمه دي، ساعات كتير كنت بحس انها بتوصفني. مريت بفتره كنت فيها ملحد، و مريت بفتره كنت فيها سلفي بن لادني حلم حياتي اني افرقع برجين لأمريكا، لكن معظم باقي الوقت كنت ثابت في نفس المكان، معدوم الهويه.

انا مش ملحد، انا حاسس و مؤمن بوجود ربنا. و متهيأ لي ان واحد من أهم الأسباب اني لسه بقول على نفسي اني مسلم هو كتابات ناس زي الشيخ جمال البنا. و قناعة شخصيه إن الإسلام فعلا ممكن يكون صح. لكن إيه فايدة الدين للعالم لو مكانش بينتج عنه غير حاجات غلط سواء كانت ظلم أو قهر أو سلبيه و استسلام لامر واقع إن كان فقر ولا طبقيه ولا إنعدام للحريه ولا غيرهم. سؤال التدوينه، أذكر عشر فوائد عمليه للدين بدون اللجوء للغيبيات زي الجنه و النار مثلا.

انا بحب South park أوي، مسلسل كرتوني عبقري جدا، في حلقه من حلقاته قدموا صوره تخيليه للعالم كمان 500 سنه بدون أي أديان لما ريتشارد دوكنز بيبقى بطل بالنسبه لكل البشر بدعوته من مئات السنين للإلحاد. طبعا المسلسل كله تهريج لكن فعلا الصوره اللي اترسمت مش بعيده عن عالم بدون أديان، برضو البشر هيلاقوا سبب علشان يقتلوا بعض و يكرهوا بعض و يحقدوا على بعض (في الحلقه صوروا ان العالم هينقسم لكذا حزب كل واحد فيهم بيدعي انه حامل راية الإلحاد في العالم و لازم يقضي على الحزبين التانيين و كل اختلاف الأحزاب دي كان بسبب التسميه المفترضه للحزب الملحد الواحد اللي المفروض يحكم العالم). مينفعش ندعي إن العالم بدون أديان هيبقى مكان أحسن بكتير، نبقى بنضحك على نفسنا. لكن في نفس الوقت الدين هو المحرك الرئيسي للأحقاد و الظلم في العالم النهارده، ظلم الصهاينه بيحركه التشدد اليهودي، إضطهاد المسيحيين في مصر بيحركه إحتقار المسيحيين اللي بينتج عن الفكر الإسلامي. طبعا هييجي مليون واحد يقول لي اللي بيعملوه المسلمين ملوش دعوه بالإسلام و يمكن حد يكلمني عن صوت يهودي من أجل السلام، متتعبش نفسك، انا قلت الكلام ده. قبل منك مليون مره و فعلا مصدقه و مش محتاج تأكيد عليه لكن برضو في النهايه المحرك الرئيسي ورا الحقد و الكراهيه هو إيه؟ الانتماء و إن كان صوري للدين ده.

انا عندي قناعه كامله ان كل الأديان ممكن يتم توظيفها لأي غرض احنا عاوزينه، للحرب، للثوره، للحب، للحقد، للسلام، للخنوع، ألخ ألخ ألخ. مش مهم الكتاب المقدس، المهم اللي ماسكه و بيقرى منه لنفسه و للناس. زي ما ممكن اقول كل يوم عاشوراء و كل أرض كربلاء، ممكن اقول أطع الأمير و إن ضرب ظهرك و أخذ مالك.

أنا لسه مسلم، و لسه مؤمن بإن الدين ده صح إذا نضفنا من عليه التراب اللي ردموه السلفيه و الإخوان و المتصوفه و غيرهم على مدار أكتر من 1400 سنه. عمر ما كلامي ده هيعجب أي حد، زي ما قلت كل واحد عنده أجنده لازم يحاول يفرضها و لو بطريقه غير مباشره على غيره، سواء كان ملحد أو سلفي أو لا ديني أو بينتمي لأي أيديولوجيه. لكن طز فيكم كلكم، كلنا صح و كلنا غلط في نفس الوقت غصب عنكم. محدش عنده إجابه واحده كامله. كلنا صح، و كلنا غلط.

بعد إذنكم طالما كان عندكم وقت تقروا الكلام الفارغ ده تترحموا على ضحايا العنف الطائفي في مصر من الناحيتين المسيحيين و المسلمين في الفتره اللي فاتت.

و تصبحوا على خير