BooDy's HomePage

اتكتب على أجيال من البلد دي يهاجروا لبلاد غريبه علشان يدوروا على حياه احسن ليهم و لولادهم سواء اتغربوا معاهم او سابوهم وراهم في مصر زي ما سابوا كل حاجه عاشوا بيها و ليها.

"شيل الشنط مع اخوك"
"متنساش و النبي تدعي لنا في الكعبه"
"دي نمرة ابن خالتي، تكلمه اول ما توصل هو هيجي لك لحد عندك ياخد الحاجه متتعبش نفسك انت"
"(زمان قبل اختراع الانترنت) يوم الخميس الساعه عشره بتوقيت مصر تستنوا جنب التليفون"

و ناس بتعيط و بتحضن بعض، كلها علامات آخر ساعه قبل السفر. شفتها مليون مره سواء في بيتنا او في حته تانيه. يمكن علشان كده بقيت بارد و مش من الناس اللي بتعيط و بتحضن بعض. انا اتولدت في بلد غريبه و اتربيت فيها و فلوس البترول هي اللي ربتني انا و اخواتي، يمكن لو فضلنا في مصر كان حالنا هيبقى اوحش من دلوقتي بكتير أصل قال الله و قال الرسول بتوع ابوي دول مبيأكلوش عيش غير في بلاد البترول. مفتكرش اني عيطت ولا مره و انا راجع هناك غير مره واحده بس. كان عندي 12 سنه و كنت عاوز اعمل اي حاجه علشان مرجعش السعوديه تاني، و مفتكرش اني قبلها كان ممكن ارفض اني اقرى كتاب الماده بتاعتهم اللي زي التربيه القوميه عندنا علشان انا مصري مش سعودي.

ساعات كتير اللي سافروا كان سفرهم طمع مش احتياج، اللي قال لك أعيش في بلد انضف و اللي قال لك كام سنه اعمل قرشين و ارجع. و اللي قال ملعون ابو دي بلد بنت كلب اروح اعيش هناك احسن من البهدله اللي انا متبهدلها هنا.

الحاجه الوحيده اللي خلتني اوصل لأقرب حاجه للعياط النهارده هي حالنا اللي احنا فيه، اللي خلى الناس تكره مصر و تفضل تعيش في بلاد البترول. ملعون أبو ولاد الكلب اللي خربوها و كانوا السبب.

ملحوظه: عنوان التدوينه واحده من الحاجات اللي اتقالت لي النهارده و اخوي مسافر