BooDy's HomePage

مكنتش عاوز اكتب تاني لكن مقدرتش. كان لازم اكتب أي حاجه عن واحد صاحبي. صاحبي ده شاب بسيط زيه زي كل الشباب اللي انضحك عليهم و مشيوا في ساقية الحياه لغاية ما خرج للدنيا و اتصدم في حقيقتها و صعوبتها. شاب عادي جدا زي أغلبية شباب مصر. أهلاوي بيحب الكوره، ملوش في السياسه، لا هو متطرف ولا هو رامي الدين وراه آخره بيصلي الفرض في وقته، بيسمع عمرو دياب و بيحب يقعد على القهوه مع اصحابه و ماشي دايما في إيده هارد الكمبيوتر علشان ينقل أفلام و لعب من اصحابه، اتخرج من الجامعه و اتبهدل علشان يلاقي شغل و مش لاقي، صاحبي ده اللي علمني يعني ايه حب مصر منغير محاضرات ولا أيديولوجيات ولا هتافات ولا كلام كبير في كتب ملهاش أول من آخر. علمني يعني ايه واحد بيحب بلده في كلمتين قالهم و هو بيتمشى معايا امبارح.

صاحبي: إنت مش ناوي تتجوز يا بودي؟
أنا: لا يا عم مش عاوز، و بعدين انا لاقي آكل أصلا يا عم الحج علشان اتجوز.
صاحبي: يعني مش أنا لوحدي، تصدق كنت فاكر ان انا لوحدي اللي كده. ده كل اللي في سننا مش لاقيين ياكلوا ياد يا بودي.
أنا: مهو الجيل ده زي اللي قبله و اللي قبل اللي قبله، كله اتظلم من تحت راس نظام فاسد ابن كلب، ربنا يسترها و نعرف نلحق الجيل اللي بعدنا.
صاحبي: طب و بعدين يا بودي. هنعمل ايه. انا مش عارف هلاقي شغل بعد ما اخلص الكورسات بتاعة ال ICDL دي ولا لا.
أنا: الظاهر ان اللي في سننا الخارج منهم من البلد دي مولود و الداخل فيها مفقود. حسبي الله و نعم الوكيل في اللي كان السبب.
صاحبي: لا! كله الا دي. مصر هتبقى أحسن ان شاء الله.
أنا: منين بس، أنا بشتغل من و انا عندي 16 سنه و متشحطط في مصر علشان الاقي شغل. القاهره هتنفجر من كتر الناس.
صاحبي: معلش، بس منسيبهاش و نمشي. منروحش نملى جيوبنا فلوس و نسيب أهالينا و بلدنا. العيشه بره مصر مش عيشه.
أنا: مهو علشان المبادئ بتاعتك دي مسافرتش لما جابوا لك شغل في الكويت. إشرب بقى.
صاحبي: و لو جابوا لي شغل بره تاني برضو مش مسافر، يعني اسافر و اقعد احوش و اتجوز واحده اسيبها هنا زي الشوال و اجي لها شهرين
في الصيف ارمي لها فلوس و امشي؟ لا افضل هنا فقير بس في بلدي.
أنا: مش لازم تفضل عايش بره مصر على طول، اقعد كام سنه و ابقى ارجع.
صاحبي: السنه بتجر سنه تانيه وراها و العمر بيعدي. أديك شايف أبو الواد ***** صاحبنا بقى له اكتر من عشرين سنه في ايطاليا و مراته و ولاده هنا بييجي يزورهم كام اسبوع في السنه و يمشي. و الله لو مات عياله ما هيزعلوا عليه، يزعلوا عليه ازاي اذا كانوا ميعرفوهوش يا جدعان
أنا: طب العيشه بره مصر مش عيشه ليه يعني؟ ما الناس بتقول لك اعيش في مكان نضيف و خلاص.
صاحبي: لو لفيت الدنيا كلها و رحت انضف حته بس مش بلدك هتحس انك غريب. مصر مش حلوه صحيح و القوي فيها بياكل الضعيف و الأمريكاني بييجي يزورها و ياكل الاتنين لكن برضو بلدنا. لو سبناها تتحرق و رحنا للغرب يستعبدونا مين اللي هيصلحها؟

لحد هنا خلص الكلام، كل واحد مننا مشي في طريق، بالرغم من ان كلام صاحبي ده ممكن يكون ساذج بالنسبه لناس كتير و بالرغم من اني مش موافقه فيه كله لكن اداني جرعة أمل. صاحبي لسه بيدور على شغل. عاوز يبقى محاسب. و لسه مش عاوز يسيب مصر.

ملحوظه لولاد الش***** اللي بيدخلوا المدونه يسيبوا تعليقات من نوع "أ** اللي بيحب مصر ده يبقى خ** و اهبل": أيوه يا ولاد د** الك** انا بحب مصر و اللي مش عاجبه يا ولاد الم***** ميبقاش يقرى المدونه بتاعتي من اصله و ميسيبليش تعليقات قذره زي دي علشان انتوا أقذر من اني انشر لكم تعليقات تاني.