الشروح الوفيه للفتاوى العنتبليه

Submitted by BooDy on Fri, 2007-04-20 20:47.

بصفتي طبعا شيخ طريقة أبو طرف و رئيس جمعية اليهوديه هي الحل آية الله أبو بودي الزقازيقي لازم كل كام يوم اخبط في نقاش مع حد من اخواننا أصحاب الفكر الإسلامي "القويم" و اتخبط لي فتوى تنزل على دماغي زي ما بيقولوا كإني أخدت تسعين قلم على غفله. آخر فتوى أخدتها هي إن مش حرام طبعا انك تزور في الورق اللي هتقدمه علشان تاخد شقه مدعومه اللي الشرط في انك تاخدها ان مرتبك ميبقاش أكتر من ألف جنيه و إن دي اسمها تجاره و التجاره شطاره ولا ايه؟ و قبلها بنص ساعه الفتوى المستكيه و هي "أوعى يا بودي يكون حد من اصحابك دول ملحد. حرام تصاحب الكفار" و لما اقول "لا ينهاكم الله عن الذين لم يقاتلوكم في الدين" ألاقي شريط من بتوع المكروباصات اتفتح علي فيه سيل من الفتاوى العنتبليه اللي بتمسح الإسلام أصلا و بتحط لنا طريقه جديده أساسها الحقد و الكراهيه.

و كإن الناس دي بتقول لربنا اركن انت على جنب احنا عارفين مصلحتك كويس متفهمناش شغلنا و النبي فبيتجاهلوا القرآن و السنه و السيره و كل حاجه في الإسلام و بيدوروا على مبررات للفتاوى دي. يعني يسيب القرآن تماما و يروح يدور على حديث ضعيف أصلا أو منقطع الصله و بيتكلم في حاجه تانيه و يستدل بيه على إن شرب العرقسوس حرام بعد نص الليل. و يا ليلتك السوده لو قلت انك مش مقاطع الدنمارك يا كافر يا عدو الرسول. ده كله إلا رسول الله هو صحيح احنا بنحلق لسيرته و دعوته عموما لكن كله إلا رسول الله يا كفره. كلمة ابن عبدالعزيز "إعادة تعريف الأصوليه" مش راضيه تخرج من دماغي من اول مره قريتها و متهيأ لي احنا في أمس الحاجه إلى إعادة التعريف ده دلوقتي و الرجوع للأصل.

طبعا الكلمه الجايه دي مش هتعجب ناس كتير بس هقولها و الأجر على الله، برنامج عمرو خالد دعوه للتعايش انا شفت منه حلقه واحده بس الاسبوع اللي فات و لو كان باقي البرنامج بالصوره دي فهو بيحاول يوصل فكره كويسه أوي احنا محتاجين لها جدا و ياريت تتابعوه و انا هحاول اتابعه و أرجو إن أي حد عنده أي آراء شخصيه في عمرو خالد يحتفظ بيها لنفسه لإنه هيقول نفس الكلام يا إما بتاع مشايخ الميكروباص أو بتاع اخواننا المسكفين اللي مبيحبوش الدعاه و ده مش المكان المناسب للمناقشه المريضه دي بغض النظر عن رأيي انا الشخصي في عمرو خالد. و لإني دكتاتور في مدونتي و مش عاوز المناقشه دي هنا و اللي مش عاجبه يشتمني في مدونته