BooDy's HomePage

من هو كريم عامر؟
عقل غبي و جاهل و متعفن و يحتقر الآخر بدون فهمه و يدعي بتعديه على معتقدات الآخرين أنه كما يصف نفسه "باحث عن الحقيقه"

لماذا يجب أن ندافع عن كريم عامر؟
في البداية لم أكن على علم بتفاصيل واقعة القبض عليه و عن مدى قانونيتها لغاية ما شرح لي علاء التفاصيل و قريت تقرير الشبكه العربيه لمعلومات حقوق الإنسان اتضح لي ان الموضوع تجاوز في خطورته ما كنت متصوره.

جمع مساجين تكسب جوايز
أعتقد ان دي صورة الدين عند الساده وكلاء النيابه اللي كانوا متواجدين بصوره غير قانونيه أثناء التحقيق مع كريم عامر. كل ما تحبس ملحدين و علمانيين أكتر كل ما ربنا يديك جوايز و حسنات و بيوت أكتر في الجنه. زي الشيبسي بالظبط. جمع الأكياس و ابعتهم على ليمان طره تكسب عشرتلاف نخله في الجنه و الاستلام فوري.
وظيفة السيد وكيل النيابه أولا هي تنحية أي آراء أو معتقدات شخصيه تماما عن القضيه المحقق فيها. يعني مش من حق السيد وكيل النيابه يسال إذا كان المتهم بيصلي و بيصوم ولا لا. هل ده له دخل بوقائع القضيه؟ و لنفرض ان كريم عامر قال انه صلى؟ هيبقى علينا من دلوقتي تقديم مستند رسمي ممضي من شيخ الجامع في شارعكم انك بتصلي على الأقل فرضين في اليوم في الجامع؟

التهم الموجهه لكريم عامر
إهانة رئيس الجمهوريه
يعني بغض النظر عن إن إهانة حسني مبارك عند الشعب المصري حاجه زي الماء و الهواء بالظبط لا يمكن الاستغناء عنها و لكن أثناء كل سفالات كريم عامر لم يتطرق بالإهانة لملك مصر المفدى حسني مبارك بيض الله وجهه و رفع كعبه و إذا كنت غلطان أرجو ان حد يصحح لي. و طبعا التهمه موجهه بغرض جمع سنين أكتر في السجن (راجع جمع مساجين تكسب جوايز)

التحريض على قلب نظام الحكم و كراهيته و الازدراء به
برضو راجع جمع مساجين تكسب جوايز

إبراز مظاهر غير لائقه بسمعة البلد و الإذاعه عنها للجمهور
و هي التهمه المقترح تغيير اسمها إلى "نشر غسيلنا الوسخ" و اللي انا في الحقيقه مش عارف ازاي هي تهمه. يعني إذا شفت حاجه غلط ودي وشك الناحيه التانيه و اوعى تقول عنها احسان تتحبس و مش مهم الغلط يتصلح احنا هنصلي لنا ركعتين في النيابه العامه فرع مشيخة الأزهر و كل حاجه هتتصلح لوحدها توماتيكي The power of faith بقى

التحريض على بغض طائفة الإسلام و تكدير السلم العام.
دي الحاجه الوحيده اللي انا شايف ان فعلا لابد من معاقبة كريم عامر عليها و خلي اللي يشتمني يتفضل و يقول اني عدو حرية التعبير و عدو حقوق الإنسان فكلامه لا يعنيني في شئ لإنه أغبى من انه يفهم الفرق بين حرية التعبير و التعدي على حقوق الآخرين و التحريض عليهم و الأخير هو الغرض الأول من كتابات كريم عامر.

حرية التعبير يا ساده يا أفاضل هي اني أقول بصوت عالي انا ملحد ولا أؤمن بوجود إله لكن شتيمة رمز الإسلام و احتقاره و سبه ده تعدي على الآخرين و ليس حرية تعبير و أرجو ان محدش يناقشني في الحكايه دي لإني معنديش استعداد اناقشها.

القبض على كريم عامر و معاملته و كأن السادة المعنيين بتطبيق العداله هم مرسلوا الله و حماة دينه خطأ لا يمكن الرضا به. ليذهب كريم عامر إلى الجحيم بكتاباته و آراءه العفنه و لكن لتطبق العداله التي حرمنا منها في كل شئ في بلدنا و أخيرا يحرم منها كريم عامر في النيابه و من بعدها القضاء.
طبقوا القانون. اعطوه حقه بالعداله. أعطونا حقنا بالحريه

العداله لكريم عامر الآن