BooDy's HomePage

المحل ده فتح تاني! هو الراجل ده مش ناوي يفقد الأمل بقى، ده خامس مشروع يفتحه و برضو هيفشل. البلد اتغيرت عن أول ما جيت. كل حاجه عماله بتتغير حواليك حتى انت نفسك بتتغير اشمعنى عاوز البلد تفضل زي ما هي، من سنه كان نفسك تعمل أي شغل في الزقازيق و تعيش الكام سنه اللي فاضلين لك فيها لغاية ما ربنا يأذن و ياخدك لها. دلوقتي منتاش عارف حتى انت عاوز تقعد في مصر كلها على بعضها ولا لا. حتى اصحابك اللي مصبرينك على العيشه دي كلهم عاوزين يسيبوها و يمشوا أو مشيوا فعلا. يا ترى عامل ايه دلوقتي في الكويت يا عوف و يا ترى هتسافر امتى انت كمان يا عم يوسف. على رأي اللي قال "سنة الحياه" مين عارف كمان عشر سنين هتعوز ايه يا واد يا بودي ولا هتبقى فين.... يا نهار اسود لو فضلت عايش كمان عشر سنين زي ما انا دلوقتي. انتحر ارحم بقى. و اخش جهنم حدف منغير واسطه ولا مجموع. الله يرحمك ياللي في بالي لو كنتي هنا دلوقتي كنت قلت اعيش كمان ميت سنه و مش هتفرق

شوف ولاد الجزمه مقطعين البوسترات بتاعة الإخوان بتاعة محمد مرسي ازاي. ربنا يفك سجنه. صحيح لسانه متبري منه و كل اللي عرفه بيقول عليه قليل الذوق لكن اهو على الأقل عمال يكافح علشان المخروبه دي. اسم الله عليك انت ياللي نايم في بيتكم و مش عاجبك حد. يسقط يسقط و كفايه و لا للتوريث و برضو التوريث هيحصل و ساعتها هندفن راسنا في الرمل و نقعد نحلل الموقف و نشجب و نشتم و نسب و نلعن و ابن ال**** و عصابته هيطلعوا لنا لسنتهم و يعملوا اللي نفسهم فيه. يعني الواحد مكانش يتولد في أي بلد بنت كلب تانيه و يعيش الكام سنه المكتوبين له منغير ما يشيل هم و خلاص. كان لازم يعني يا رب تجيبني في البلد دي و تعيشني العيشه دي! يالله اللهم لا اعتراض

علي النعمه انا اتجننت رسمي....... و انت من امته عاقل يا حبيبي ده انت الجنان بتاعك علامه مسجله. اقعد يا اخوي على الرصيف و اكتب آل يعني هتفرق. أيوه هتفرق يا عم قوم روح البيت اقرى لك كلمتين انت رايح تستلم شغل في مكان جديد كمان كام يوم و مين عارف الكلمتين اللي هتقراهم دول جايز ينفعوك. و النبي يا اخوي تتنيل و تقعد آل يعني هتروح الشركه الجديده تخترع الذره مهو نفس الشغل اللي طول عمرك بتحبه و عايش علشانه و لو على كلمتين زياده تتعلمهم ابقى اتعلمهم بكره الدنيا مش هتطير دلوقتي. هو انا صحيح كمان خمس سنين هشتغل ايه؟ علي النعمه شكلك هيحصل لك زي ما حصل لبتوع الكوبول و الفورتران و هتلاقي نفسك فجأه منغير لا إحم ولا دستور محدش عاوز PHP. يعني يا رب ما كنت تخليني زي أي بقف اعيش اي عيشه و مفكرش و مشوفش اللي انا شفته و يبقى معايا قرشين افتح محل موبايلات ولا انترنت كافيه و اقعد فيه و اجيب واحد حمار زي بتاع امبارح اللي كان مصمم ان مشكلة الكابل المفصول من الراوتر مشكلة DNS اشغله عندي يطلع ميتين الخلق و خلاص. ياااه تسع شهور في الشركه دي عدوا زي الهوا. مين كان يصدق ان الشركه اللي كنت مبسوط فيها في الأول و عامل حسابي اني مش همشي منها إلى ما شاء الله اوصل في يوم من الأيام اني ابقى مش طايق احط رجلي فيها. منه لله اللي كان السبب بقى. مش مزعلني بس غير الواد شريف و الواد عمرو معنتش هشوفهم كل يوم. شريف مقدور عليه اهو كل كام اسبوع بييجي روستري لكن عمرو مبينزلش من بيتهم الا بطلوع الروح.

يادي النيله كمان رساله علشان العيد. يا جدعان بلا عيد سعيد بلا هباب و الله ماهو سعيد ولا نيله و زيه زي غيره من الأيام الكئيبه اللي مش عايزه تعدي. و ميتين ام الموبايل اللي عاوز الحرق كل زرايره بايظه و مش عارف ارد على رسالة حد ولا ابعت لحد رساله علشان يهيص و ينبسط بالعيد السعيد. يالله اللي مش عاجبه يبقى يقاطعني انا مش ناقص هم بلا عيد بلا قرف يعني حتى في دي هتلبس لهم ماسك علشان ينبسطوا. اللي عاوز يعيد يروح يعيد بعيد عني انا مش ناقص.