BooDy's HomePage

امبارح حصلت خناقه صغيره بيني و بين اتنين اصحابي على جايكو لما قلت اني سعيد جدا بمقابلة جمال البنا لأول مره. جمال البنا من أكتر الناس اللي أثروا في طريقة تفكيري و نظرتي للإسلام لكن دايما لما بحاول أشرح رأي لجمال البنا أو لما بطرح فكره معينه له لأول مره مع أي حد بيكون رد الفعل عدائي جدا لشخص جمال البنا. رد الفعل ده غالبا بيكون نتيجه لمعلومات مغلوطه عند الناس عن جمال البنا شخصيا أو عن أي رأي قاله زي مثلا مؤخرا الناس كلها كانت متصوره ان جمال البنا بيحلل القبلات بين الجنسين و وصلت الحكايه ان واحد قال لي ان جمال البنا بيحلل الزنا. المشكله هنا هي مصدر المعلومات اللي الناس بترجع له و اللي بيبقى سبب مشاكل كتيره مش بس مع جمال البنا لكن في حاجات كتيره أوي، من كام أسبوع مثلا كنت قاعد مع مديري و كان بيحكي عن موظف بيقول إن سعد زغلول "كان خامورجي" و راجل مش كويس، الموظف ده كان كله ثقه في كلامه و إنه مش محتاج يدور على أي مصدر يقرى منه عن سعد زغلول لإنه شاف المسلسل خلاص :)

أوروبا في القرون الوسطى كان مصدر المعلومات الأساسي فيها للطبقه المتعلمه جاي من الكتابات المنقوله باللغه اللاتينيه و الطبقه الحاكمه كانت بتتكلم غالبا باللغه اللاتينيه و باقي اللغات اللي اتطورت بعد كده علشان تبقى الفرنساوي و الألماني و الهولندي و غيرهم كانت هي لغات عامة الشعوب و اللي بتتنقل بيها المعلومات برضو. النهارده عندنا نفس التقسيمه تقريبا بين طبقة المثقفين (أنا بستخدم كلمة المثقفين لإنها الكلمه الدارجه مع إنها الكلمه الغلط) و السواد الأعظم من الناس بس الفرق مش في اللغات و لكن في مصدر المعلومات، دلوقتي مصدر معلومات الطبقه المتعلمه أو المثقفه هي الكتب أو المعلومات المكتوبه بشكل أو بآخر سواء كانت صحافه أو أبحاث أو أي شكل تاني للكتابه. و المصدر الأساسي للسواد الأعظم من الناس هو وسائل الإعلام المرئيه، المسموعه، و في آخر الترتيب المقروءه.

وسائل الإعلام
الأزمه حاليا إن مصدر المعلومات ده ملوث ولا يمكن الثقه فيه، وسائل الإعلام المسيطره دلوقتي زي ما انا شايفها ممكن نقسمها لقسمين. الأول وسائل إعلام بتخدم تيار معين. و التاني وسائل إعلام ربحيه.

وسائل الإعلام اللي بتخدم تيار معين لو قلنا انه تيار سياسي أو فكري لا يمكن الثقه فيها لإنها هتبقى ماشيه في اتجاه واحد و هو خدمة التيار ده بأي شكل من الأشكال لإن التيار ده هو السبب الأول لوجودها. مش ممكن وسائل الإعلام اللي بتمولها حكومه دكتاتوريه تنشر أي معلومات عن فساد الحكومه دي. مش ممكن قناة تلفزيونيه أنشأت لنشر الفكر الوهابي هتتبنى وجهة نظر شيعيه أو تجديديه. مش ممكن قناة تلفزيونيه أنشأت لدعم التيار اليميني هتتبنى وجهة نظر اشتراكيه، إلخ إلخ إلخ. الأمثله على كده كتير أوي و في كل مكان في العالم مش في المنطقه العربيه بس، لو رحنا على أمريكا هنلاقي شبكة فوكس دائما و أبدا بتعرض وجهة النظر اليمينيه المحافظه و بتنشر أكاذيب كتيره علشان خدمة الفكر ده.

وسائل الإعلام الربحيه برضو فيها مشكله، الهدف الأول من وجودها هو الربح و الاستمرار أو البقاء. إذا كان الهدف الأول هو الربح يبقى من الصعب الاعتماد عليها لإن في أغلب الأوقات إذا وضعت الأرباح في كفه و الشرف الإعلامي في الكفه التانيه أكيد الأرباح هتكسب. و إذا كان الهدف التاني هو البقاء يبقى برضو صعب الاعتماد عليها لإننا لو بدلنا الأرباح بتفادي المخاطر سواء كانت من حرب اقتصاديه أو من سلطة حكومات يبقى برضو الشرف الإعلامي هيخسر. ممكن طبعا نلاقي تجارب لوسائل إعلام مستقله هدفها الأول هو نشر الحقائق زي Democracy Now لكن خلي بالك إني قلت في الأول اني بتكلم على وسائل الإعلام المسيطره، يعني وسائل الإعلام المنتشره بصوره كبيره و الشريحه الأكبر من الجماهير بتتابعها.

الصحافه الشعبيه
يمكن تكون الأكثر مصداقيه لكن برضو فيها مشاكل، مش ممكن نقول ان صاحب أي مدونه و هو بيكتب بيتجاهل تماما ميوله الفكريه حتى و إن كانت مش واضحه في المدونه لكن هتفضل موجوده جواه. الميزه المهمه هنا إن المصدر هنا مش مركزي، متوزع في مليون مكان و مليون اتجاه و مليون تيار، يعني مينفعش يسيطر عليه فكره معينه أو هدف معين أيا كان.

الصحافه التعاونيه Collaborative journalism
معرفش الترجمه كده دقيقه ولا لأ بس لو حد عنده ترجمه أحسن يقول لي.
أكبر موسوعه موجوده النهارده و اللي عادة بنثق فيها هي ويكيبيديا، الموسوعه مبنيه على فكرة التحرير التعاوني، مفيش حد بيسيطر على المعلومات المكتوبه في الموسوعه، كل الناس من كل التيارات و كل الاتجاهات ممكن تكتب فيها و تعدل لحد ما نوصل لشكل نهائي للمعلومه نقدر نقول انه الأدق. الصحافه التعاونيه مبنيه على نفس الفكره، مجموعه من المحررين و المراسلين من كذا اتجاه و تيار بيكتبوا في نفس الخبر و بكده الخبر بيوصل بموضوعيه أكتر، المشروع الأخت لويكيبيديا هو ويكي الأخبار و هو التطبيق الأكبر لمبدئ الصحافه التعاونيه النهارده لكن زيه زي الصحافه الشعبيه و المستقله مبيوصلش للشريحه الأكبر من الناس.

إقرأ
أنا مش لاقي حل لمشكلة نقل الأخبار أو المعلومات الصح عموما. التدوينه دي كانت كلها تفكير بصوت عالي. متهيأ لي إن أكبر مشكله عندنا هي إن القراءه بقت ممارسه غريبه على الناس. و في انعدام وجود وسائل إعلام ممكن نثق فيها و مش هدفها الأول الفرقعه الإعلاميه و الربح المشكله بتتضاعف، مش بس عندنا نقص في المعلومات لا كمان عندنا معلومات غلط. إني أقول لحد اقرى الكتاب الفلاني علشان تفهم وجهة النظر دي بيبقى شئ قاتل لأي مناقشه لإن أغلب الظن محدش هيتعب نفسه و يقرى كتاب علشان يفهم حاجه أيا كان حجم الكتاب و أهمية الموضوع، طالما قراءة الكتاب ده مش مفروضه عليه في جامعه أو مدرسه يبقى مش هيفكر أصلا يقراه. و مش حاسس ان الحل هو في مشروع القراءه للجميع بتاع ماما سوزان، ولا يمكن يكون هو ده الحل؟ ننسى الجيل اللي انضرب بالفعل و نركز على الأجيال الجايه نعودهم على القرايه من الأول ولا نحاول نلاقي طريقه نستغل بيها وسائل الإعلام الموجوده دلوقتي اللي بتصب في عقول الناس علشان نوصل المعلومات الصح؟

مش عارف، فعلا مش عارف.
تصبحوا على خير.