BooDy's HomePage

ساعات قبل ما انام بيدخل دماغي كلمتين مبعرفش انام غير لما اكتبهم او اقولهم لحد. الساعه دلوقتي اتنين بالليل فصعب الاقي حد اكلمه، بعد ما دخلت السرير و قفلت النور لقيت نفسي فطسان على روحي من الضحك علشان افتكرت الحاجات اللي كنت عاوز اعملها قبل ما امشي من اوبن كرافت بس ملحقتش.

أوبن كرافت، غريبه اني اقول على الشغل انه بيتي التاني، مش كده؟ بس هو الحقيقه اوبن كرافت لفتره مش قصيره كانت بيتي الأولاني. كنت بقضي فيها وقت اكتر من الوقت اللي بقضيه في البيت و مكنتش بشتكي بالعكس، كل دقيقه كانت حلوه. حتى و انا بسب و العن في الشغل كان الوقت حلو.

1/11/2006 - أول يوم في الشغل. مديري لما وصل الشركه دخل علي و منغير ما يقول ولا كلمه شال اللابتوب بتاعي من قدامي و مشي، دخل مكتبه!. تخيل انت موظف جديد تعمل معاه كده علشان تقعد معاه أول مره تشرحله الشغل ماشي ازاي في الشركه.

الساعه خمسه، كل يوم الساعه خمسه كنت بنزل من أوضتي فوق اقعد مع اصحابي نتكلم أي كلام سفسطائي تماما، كلام في السقف. برضو تخيل كده معايا مجموعة ناس قاعدين في مكتب بعد الشغل بيتكلموا عن نظرة المجتمع للفرد أو علاقة الإنسان بربنا و الفرق بين الأفكار المقولبه و الأفكار المعلبه...... و بعدها بدقيقتين عن شعر احمد عز.

مش قادر احدد بالظبط مين كان اكتر واحد مجنون فينا، كل واحد كان مجنون بطريقته. فعلا مكانش في حد عاقل. أنا عن نفسي عملت حاجات في المكتب عمري ما عملتها في أي شغل تاني و عمري ما هعملها أكيد في أي شغل بعد كده. مشيت بالشراب في الشركه لما كانت الجزمه الجديده واجعه رجلي، كان عندي عربيه لعبه كبيره بنلعب بيها كلنا و الحقيقه مكانتش دي اللعبه الوحيده اللي عندي. مديرة المكتب لما كانت بتحب تجبرني اعمل حاجه مش عاوزها كانت بتاخد اللعب بتاعتي و تقفل عليها. دي علاقة مديرة المكتب بالموظفين في أوبن كرافت، بتخبي اللعب بتاعتنا لما تبقى عاوزانا نسكت. شوف انت لما شحط عنده 24 سنه بيقول لمديرة المكتب و هي ماشيه قدامه و شايله العربيه اللعبه بتاعته "و النبي يا إيريني، خلاص حرمت مش هلعب بيها تاني دلوقتي، و الله حرمت خلاص خلاص خلاص عشان خاطري".

الغريب بقى ان في وسط الكلام ده كله كان عندنا فرصه فعلا نشتغل و ننتج، مش قادر احدد لغاية دلوقتي هل اننا كنا اصحاب أوي أثر بالسلب ولا الإيجاب على الشغل، لكن اللي متأكد منه اننا فعلا كنا بنحب الشغل في الشركه مش بس اللعب. و اننا فعلا كنا بننتج بجد. مكانش عندنا سياسه في التعامل مع بعض، مكانش حد بيفكر قبل ما يساعد حد أو يطلب مساعده من حد، مكانش في حد بيحاول يلبس حد في الحيط قدام مديره ولا بيحاول يبقى بطل.

3 سنين قضيتهم في أوبن كرافت، اتغيرت فيهم كتير، الناس اللي حوالي أثروا في. اتعلمت، غيرت رأيي و تفكيري في حاجات كتيره، قربت من ربنا و بعدت و قربت، حبيت و كرهت، مش حاسس بالندم على دقيقه واحده قضيتها في أوبن كرافت، مفيش غير حاجه واحده بس اللي حاسس بالندم عليها و يمكن لو رجع بي الزمن هغيرها، مش عارف.

كل الكلام ده و مقلتش الحاجات اللي كان نفسي اعملها و ملحقتش، عموما اهم:

1- أدخل الشركه قدام مديرة المكتب بعودين قصب، مش مهم اذا كنا هنقشر و نمص القصب في الشركه ولا لا، بس المهم اني ادخل بيهم قدام إيريني.

2- أقنع العيال اللي عدوا السن القانوني و ادخلهم بار و هم مفيش ولا واحد فيهم بيشرب، أو اقعدهم في وسط البلد على البورصه أو التكعيبه وسط اخواننا المثقفين.

3- أجيب Lightsaber لي انا و الواد طولان و نلعب بيهم في المكتب.

4- أجيب طياره صغيره بريموت العب بيها في المكتب.

5- ألم الولاد و نتفرج على فيلم ثقافي على البروجكتور بعد ما كل البنات يروحوا من الشركه.

بس أكتر حاجه نفسي فيها فعلا هي اني اقول لكل اللي عرفتهم في أوبن كرافت شكرا، شكرا على كل حاجه. اصحابي اللي يعرفوني كويس عارفين اني مش إنسان سعيد طول الوقت أو حتى جزء من الوقت، شكرا لكل واحد كان سبب في إني 8 ساعات في اليوم، خمس ايام في الاسبوع لمدة 3 سنين كنت مبسوط. شكرا على كل دقيقه و على كل ذكرى حلوه أو وحشه. حتى لو كان حد بيكرهني و بكرهه، شكرا. مش عارف هيقروا الكلام ده ولا لا، و يمكن الأحسن ميقروهوش علشان ميقلبش على حد المواجع، احنا ما صدقنا الأيام بدأت تعدي و بنحاول نتأقلم على حياتنا بعد ما الشركه قفلت، على رأي ستي الله يرحمها، يا معزي بعد سنه يا مجدد الأحزان.

ملحوظه: لسبب ما لا يعلمه إلا الله إسم الشركه كان صعب جدا حفظه و نطقه على ناس كتير و كانوا بيغلطوا فيه و يطلعوا بنسخ عجيبه، أبون كرست واحد من النسخ دي لإسم أوبن كرافت.