BooDy's HomePage

نادر اني اعترف ان في حد أثر في شخصيا و دايما بنسب أي تطور في شخصيتي لعبقريتي المتواضعه و نظرية التطور الطبيعي للحاجه الساقعه العلميه. النهارده التدوينه دي إهداء للأخ العزيز شيخ الطريقه الفيصليه و أسقف الكنيسه البمبيه، إنه آية الله سماحة السيد علاء عبدالفتاح أطال الله في عمره.

أول معرفتي بيه كانت عن طريق Linux Egypt و أول لقاء بيه كان في مهرجان البرمجيات الحره في واحد مايو 2004 و ده كان أول تعامل بيني و بين أي حد من مجتمع البرمجيات الحره في مصر وجها لوجه. يؤسفني الاعتراف ان بسبب علاء جربت ماندريفا لأول مره و آخر مره لحد ما هداني الله لنور دبيان و من بعده اوبنتو.

علاء كان من اكتر الناس اللي أثرت في فعلا، من النادر انك تلاقي حد ممكن تتناقش معاه في حاجات كتير مهمة بالنسبه لك، آراء علاء في الدين و السياسه و المصادر المفتوحه كانت دايما واحد من الأسباب اني أعيد التفكير في أي من المواضيع دي من زاويه تانيه جديده تماما بالنسبه لي. عن طريقه اتعرفت على Lawrence Lessig و كانت أول حاجه قريتها له عن طريق علاء هي Free Culture اللي حاول علاء أكتر من مره انه يخليني اترجمه و بائت كل محاولاته بالفشل للأسف علشان انا كسلت بصراحه.

من أكتر المشاهد اللطيفه اللي ممكن تشوفها هي علاء عبدالفتاح في أول أي مظاهره لما بيتقابل مع الناس و بيقضي وقت لطيف و كأنه في نادي اجتماعي و حاطط ايده في جيبه، و يا ويلك و يا سواد ليلك لو اتقطع له تي شيرت، هتلاقي وحش كاسر، إنسان الغاب، طويل الناب ظهر قدامك (جاب لي حالة ذعر لما اتنرفز و قرر انه يشتم و يهتف ضد نبيل العزبي و هو بينه و بينه متر و نص، منك لله يا شيخ لو معرفتش اجيب عيال بسببك).

برضو مقدرش انكر ان كان له تأثير في اني ابدأ اكتب في المدونه المخروبه دي اللي جايبه لي الهم من يوم ما فتحتها. و كان إدمانه لدروبال السبب انه عرفني الطريق البطال ده و تخليت عن أي آمال اني ابني حاجه للويب من الصفر و لازلت ليومنا ده بستخدم دروبال في 99% من أي شغل بعمله و حتى في المدونه (و إن كنت برضو ليومنا ده مش طايق PHP بس أكل العيش مر).

للأسف قرر السيد علاء هو و حرمه المصون السيده منال انهم ينقلوا محل إقامتهم الدائم لجنوب أفريقيا و بالتالي المقر الرئيسي لمنظمة 30 فبراير الإرهابيه الدوليه معاهم بما إن المقر الرئيسي كان في بيتهم هنا. بالرغم من إن معظم لقائاتنا مؤخرا كانت لقائات إلكترونيه في الفضاء السيبري (انا بجيب الكلام ده منين؟؟؟) إلا إن سفرهم هيسيب فراغ كبير و يؤكد مخاوفي إن الثوره العالميه القادمه لن تشتعل نيرانها من العمرانيه.

علاء، منال، تروحوا و تيجوا بالسلامه.