BooDy's HomePage

اول ما بدأت المدونه دي من 3 سنين تقريبا كانت عامله زي بيتي التاني. المكان اللي بهرب له دابما علشان انفس عن غضبي و زهقي و قرفي من الوضع اللي انا شايفه قدامي. و مخبيش عليكم انا كنت ضاحك على نفسي في يوم من الأيام و مصدق اني بعرف اكتب و كان نفسي اكتب و لو قصه قصيره على المدونه دي لكن ربنا سترها و محاولتش و مين عارف ده انقذ عقل كام ضحيه كانوا هيقروا الكلام اللي هكتبه.

مع الوقت الشئ ده اتغير، المكان اللي كان زي بيتي بقى مكان بتخنق لما بدخله، مساحة الحريه بقت أقل لدرجة اني بدأت مدونه تانيه بعيده تماما عن دي علشان ادور على مساحة الحريه دي تاني لكن لسوء لحظي أعز اصحابي عرفوا المدونه دي و مقدرش ألوم اي حد على ده لكن مساحة الحريه الصغيره اللي كانت هناك ماتت فشديت الصاج و شمعت المحل بالشمع الاحمر و رجعت هنا تاني.

ساعات كتير كنت ببقى محتاج إني اكذب في كلام بكتبه هنا علشان أشخاص معينيين ميتأثروش بكلامي و ساعات كتير علشان انا مش ملزم اني اتكلم عن خصوصياتي على الملأ و لما جربت اتكلم بصراحه شويه كانت النتيجه محبطه بالنسبه لي علشان ردود فعل اصحاب أو قرايب لي و انتهت التدوينات دي إلى مقبرة ال unpublished posts.

أيوه انا مفيش دقيقه بقضيها لوحدي إلا و بفكر ألف مره في الوقت اللي حياتي فيه تنتهي و معنديش أي مسئوليه تجاه أي حد اني احكي له ليه و ايه اللي وصلني للحاله دي و مش ملزم اني امدد على الشيزلونج التدويني علشان واحد اهبل ميتبرعش بكلمه متخلفه هو مش فاهم هي بتأثر في ازاي لما يقرى تدوينه زي دي

من شهر تقريبا زي كل سنه في نفس التاريخ ده كنت على حافة الهاويه. عملت الحاجه اللي بتريحني شويه و سهرت في الشغل لكن لسبب ما فضلت مكتئب لغاية دلوقتي و في ليله كالحة الظلام و الناس نيام (حلوه نيام دي؟) قررت اني احاول اهرب تاني لمساحة الحريه بتاعتي و كتبت التدوينه دي

بعد ما نمت و صحيت افتكرت ان اكتر ناس مش عاوزهم يقروا الكلام ده هيقروه و افتكرت قد ايه مساحة الحريه اللي انا كنت متصور انها موجوده امبارح مش حقيقيه فكالمعتاد شلت التدوينه لكن للأسف كان الوقت متأخر شويه. واحد صاحبي قراها و رد علي بتدوينه مليانه كلام كبير أوي

ملحوظه لصاحبي ده: لسبب ما انت طول عمرك حساس زياده عن اللازم و بتقفش بسرعه و بتفهم 99.9% من كلامي غلط فأرجوا انك متفهمش الكلام الجاي ده غلط لإني يا عزيزي مقصدش أهينك بيه، يا عزيزي الكلام الكبير اللي انت كاتبه ده ينفع في المسلسلات المكسيكي لما فرناندو حبيبته يجي لها فقدان ذاكره و تختفي و تحب عدوه خوسيه ماريا لكن ملوش دعوه بالواقع ولا انا محتاج "لوقوفك جنبي" ولا محتاج "لنفسيه قريبه من نفسيتي" و لو كنت محتاج للكلام ده فده كان من خمس سنين مش دلوقتي :) فعلى رأي الأمريكان Thanks, but no thanks :)

انا بتخنق أوي من تدوينات الوداع الأخير دي و دي مش منهم. ميتهيأليش اني هبطل تدوين، منهم لله اللي كانوا السبب و علموني العاده البطاله دي لكن مدونتي دي كانت في المقام الأول مدونه شخصيه بفضفض فيها معاكم و بما ان الفضفضه دي بقت بتخنق أكتر ما بتنفع و مساحة الحريه العملاقه بقت اصغر من زنزانه متر في متر فبلاش منها احسن و ده معناه ان تدويناتي هنا هتبقى قليله أوي تكاد تكون معدومه.

أشوفكم على خير :)