BooDy's HomePage

فاكرين لعبة بنك الحظ ولا مونوبلي؟ كان في كرت بيطلع لك يخرجك من خانة السجن منغير ما تدفع الغرامه. واضح ان في حياتنا عموما في كروت زي دي، أهمها طبعا انك مسلم. اتولدت مسلم؟ ألف مبروك، طلع لك كرت الخروج من السجن بدون مقابل طالما اللي هترتكب جريمه في حقهم غير مسلمين.

بتكلم مع الناس في إن البشير مطلوب لتهم جرايم حرب ارتكبت في دارفور. رد الفعل الأول هو إن ده جزء من المؤامره العالميه على الإسلام و المسلمين، و اشمعنى يعني البشير هو اللي عاوزين يحاسبوه؟ طب ما يحاسبوا اسرائيل الأول ولا هو علشان البشير مسلم يعني؟!؟

مجموعة أعضاء eglug في اسكندريه بيدعوكم لحضور يوم جنو لينكس في اسكندريه يوم 9 مارس الجاي، شاركنا للتعرف أكتر على البرمجيات الحره و اعزم اصحابك و قرايبك و الجيران و أي حد معدي في الشارع، الدعوه مفتوحه للجميع.

أشوفكم هناك ان شاء الله

مع بداية أحداث غزه كانت كل الدلائل و التصريحات بتقول إن حماس هي اللي خرقت التهدئه، و بناء عليه بسبب اني متحيز نوعا ما ضد سياسات حماس عموما تقبلت الكلام ده منغير ما اتأكد و كتبت تدوينه كنت متحيز فيها ضد حماس.

ثبت بعد كده ان الصهاينه هما اللي بدأوا بخرق التهدئة و صواريخ حماس كانت رد فعل للخرق ده. و فعليا دلوقتي اللي شايفه ان مكانش في حاجه حماس ممكن تعملها علشان توقف الحرب دي.

أنا لازلت ضد مواقف حماس كحركه ثيوقراطيه همها الأول هو إقامة الإماره الإسلاميه فعلا. و مختلف مع الاستراتيجيه اللي بتتبعها و مع موقفها من فتح المعابر. لكن لازم اعتذر لإني غلطت في موضوع خرق التهدئه.

أه و برضو لسه رأيي ان الإخوان عاوزين الحرق و مهدي عاكف كبر و خرف.

المفروض بما إني مصري أشعر بالخزي و العار دلوقتي، صح؟ يؤسفني إني أخيب ظن القارئ العزيز لإني سأظل دائما و أبدا فخور بإني مصري. برغم خيانة و عمالة الحكومة المصريه اللي عمري ما اخترتها و رافضها و هفضل رافضها لغاية ما تغور عننا. برغم ده برضو انا فخور اني مصري لإني ولا خنت فلسطين ولا عملت حاجه ضد المقاومه ولا هعمل، الخونه هما السياسيين و زي ما عندنا خونه كل الدول العربيه بيحكمها خونه و كلاب، زي ما عندنا حزب وطني ديموقراطي زي ما فلسطين عندها فتح.

كنت بدأت اكتب تدوينه علشان أفش غلي بعد حرقة الدم اللي شفتها من مشروع ويكيبيديا المصريه و الجهل و القوميه الغبيه اللي بيدل عليهم المشروع ده. للأسف محدش رد على الهبل ده غير الإسلاميين الدهلات اللي كل همهم الحفاظ على لغة القرآن. لكن صحيت النهارده الصبح على تدوينه عبقريه من طي المتصل اللي أكيد عنده إلمام اكبر مني بكتير باللغويات و بيعرف برضو يتحكم في أعصابه و هو بيكتب اكتر مني. مش من عادتي إني أشاور على تدوينه عجبتني لكن فعلا أول مره من زمان أحس ان حد كتب حاجه كنت بفكر فيها بصوره أحسن مليون مره من اللي كنت هكتبه.

اقروا عند أحمد غربيه تدوينة البتاع عن ويكيبيديا المصريه.

هو يعني ايه ضمير و النبي؟ بصفتي راجل جاهل نفسي حد يفهمني ايه هو الضمير بالظبط؟ اللي شايفه قدامي ان الضمير تعريفه ان واحد يبقى متضايق من حاجه وحشه عملها فيحاول يحس انه انسان كويس و جميل بإنه يصلحها، مش مهم يصلحها ازاي بس المهم انه يحس انه احسن و يستريح و طز في باقي الناس. مش فاهم انا ايه الفايده اللي هترجع علي من الاعتذار؟ واحد يقول لي انت عيل واطي صحيح، ما كفايه عليك القيمه المعنويه... للأخ اللي بيقول كده اسمح لي اقول لك معنويه دي تبقى خالتك!

"و الست بتاعه كمان، هيجيب الديب من ديله، و يشبع كل جعان".

دي أغنية للشيخ إمام الله يرحمه و كلمات أحمد فؤاد نجم ربنا يديله الصحه و يطول لنا في عمره. فاليري جيسكار ديستان كان رئيس فرنسا في السبعينات، معلوماتي عن الفتره دي محدوده أوي لكن على حد علمي كان في نوع من التفاؤل في الشارع المصري بانتخاب فاليري و كان الناس حاطين أمل كبير و حاسين ان وصوله للحكم في فرنسا حاجه كويسه لفرنسا و لمصر و للكون كله. طبعا بما إن انا عيل صغير مواليد 1984 معشتش الفتره دي و معنديش انطباع عنها لكن مش هبقى مستفرب لو حد أكد لي الكلام ده و أكد لي ردة الفعل دي في السبعينات لإني شايفها دلوقتي في الشارع المصري بعد نجاح باراك اوباما في أمريكا.

No we can't

نادر اني اعترف ان في حد أثر في شخصيا و دايما بنسب أي تطور في شخصيتي لعبقريتي المتواضعه و نظرية التطور الطبيعي للحاجه الساقعه العلميه. النهارده التدوينه دي إهداء للأخ العزيز شيخ الطريقه الفيصليه و أسقف الكنيسه البمبيه، إنه آية الله سماحة السيد علاء عبدالفتاح أطال الله في عمره.

أول معرفتي بيه كانت عن طريق Linux Egypt و أول لقاء بيه كان في مهرجان البرمجيات الحره في واحد مايو 2004 و ده كان أول تعامل بيني و بين أي حد من مجتمع البرمجيات الحره في مصر وجها لوجه. يؤسفني الاعتراف ان بسبب علاء جربت ماندريفا لأول مره و آخر مره لحد ما هداني الله لنور دبيان و من بعده اوبنتو.

كل واحد عنده مجموعة معتقدات متصور انها هي الصح و اللي حواليه كلهم غلط، طول عمري عندي مشكله اني اصنف نفسي لأني عمري ما عرفت انا زي مين بالظبط، دايما كنت بعرف نفسي على إني مسلم و هويتي الإسلاميه هي حجر الأساس لشخصيتي و لحياتي عموما. "كنت ملحدا على سنة الله و رسوله" استاذنا الله يرحمه عبدالوهاب المسيري قال الكلمه دي، ساعات كتير كنت بحس انها بتوصفني. مريت بفتره كنت فيها ملحد، و مريت بفتره كنت فيها سلفي بن لادني حلم حياتي اني افرقع برجين لأمريكا، لكن معظم باقي الوقت كنت ثابت في نفس المكان، معدوم الهويه.

- البطل الشعبي A for A7A يعلن مسئوليته عن العمليه و يعد بتكرارها كمان عشر سنين

- كتائب الشهيد مالك مصطفى تنفي صلتها بالحادث و تندد باتهامها بالغباء لدرجة حرق المجلس و هو فاضي

- نقل مجلسي الشعب و الشورى للقاهره الجديده بتكلفة عشرميت مليار جنيه

- منع أعضاء المجلس من الإخوان المسلمين من الدخول بحجة ان اسمائهم كانت مكتوبه في الورقه القديمه اللي اتحرقت في البوفيه و لا يمكن إثبات صحة عضويتهم

- إعلان المصالحه بين حديد عز و مجموعة طلعت مصطفى من أجل الوحده الوطنيه في مواجهة هذه الكارثه الإنسانيه

- إعلان مجموعة طلعت مصطفى عن مشروع "مجلسي" السكني مكان مجلس الشورى القديم