BooDy's HomePage

يوم حرية البرمجيات

هو يوم بيتم كل سنه لتعريف الناس على البرمجيات الحره و فايدة استخدامها بدل من البرمجيات الاحتكاريه. اليوم بتقوم بيه مجموعات متطوعين في أماكن مختلفه من العالم و السنه دي في مجموعة من المتطوعين في جامعة اسكندريه قرروا ينظموا اليوم هنا في مصر في جامعة اسكندريه بس الجديد انهم مش بس هينظموا يوم واحد لكن المفروض انهم بينظموا لأسبوعين ابتداءا من أول سبتمبر

لو عندك مشاكل مع الكمبيوتر بتاعك، مهتم تعرف يعني إيه حرية برمجيات و يعني إيه حرية علم و معرفه ياريت تحضر اليوم ده في جامعة اسكندريه

صفحة الحدث على فيس بوك

سنة 1992

"قوم يا عبدالرحمن غير القناه و هات لنا الأخبار"

أكتر الأوامر اللي كنت بكرهها، في مرحلة ما قبل انتشار الريموت كونترول. مش بس لازم اقوم من مكاني لا كمان لازم اغير القناه و اجيب نشرة الأخبار. كنت بكره نشرة الأخبار أوي. و أبوي مكانش (و مازال) بيتفرج غير على نشرة الأخبار. متهيألي ان أسعد أيام حياته لما اكتشفنا ان في حاجه اسمها قنوات إخباريه.... يعني القناه طول اليوم أخبار! مفيش كرتون؟! مفيش أغاني؟! يا رب الإرسال بتاع القناه دي يقطع و ميوصلش عندنا تاني يا رب.

و طبعا لو كانت نشرة أخبار التاسعه و النصف مساءا، يتزامن الأمر مع تذكير "ودي" بإن معاد النوم قرب و ان عندي مدرسه بكره الصبح و لازم اقوم أجهز الشنطه لبكره و أجهز نفسي علشان انام.

"كل عام وأنت حبيبتي ..أقولها لك بكل بساطه ..كما يقرأ طفل صلاته قبل النوم"

بكل بساطه، و ربما بكل حماقه، يقولها مخاطبا الفراغ اللا متناهي الذي تركته ورائها. صوت فيروز، كلمات نزار، أغنية لرونان كيتنج أحبها و لم تحبها، بقايا أماكن اللقاء، أبيات للحلاج، كلها قصاصات ملقاة على جوانب طريقه، يتجاهلها حيناً و يجمعها حيناً آخر.

"أه يا سيدتي لو كان الأمر بيدي.. لأقمت عاصمة لك في ضاحية الوقت.. لا تأخذ بنظام الساعات الشمسية و الرمليه.. ولا يبدأ فيها الزمن الحقيقي .. إلا عندما تأخد يدك الصغيرة قيلولتها داخل يدي"

ستبقى دائما ذكرى هذه القيلولة ليدها الصغيرة داخل يده، سيبقى هذا الجسر ممتدا بين الحياة و الموت.

متهيأ لي مفيش حد في الكون بيحب ولاد أخوي قد جدهم، فعلا حكاية أعز من الولد ولد الولد دي صح أوي. سؤالين يطرحوا أنفسهم حاليا. الاولاني هل ملك مصر المفدى منهار دلوقتي و حاسس بألم شديد على حفيده؟ و لو حاسس بالألم و الحزن يا ترى إيه إحساسه و هو شايف النفاق و الكذب اللي بيحصل علشان كل واحد عاوز يكسب شوية نقط؟ يعني هو متعود على النفاق و الكذب دول أكيد من ساعة ما تولى الحكم في مملكته السعيده لكن النفاق المره دي باين زياده و جاي في مناسبه المفروض انها مؤلمه بزياده، يا ترى هيثور و يقول لااااااا كله إلا حفيدي حبيبي ضنايا نور عيني يا كلاب يا وحشين إهئ إهئ إهئ.

امبارح حصلت خناقه صغيره بيني و بين اتنين اصحابي على جايكو لما قلت اني سعيد جدا بمقابلة جمال البنا لأول مره. جمال البنا من أكتر الناس اللي أثروا في طريقة تفكيري و نظرتي للإسلام لكن دايما لما بحاول أشرح رأي لجمال البنا أو لما بطرح فكره معينه له لأول مره مع أي حد بيكون رد الفعل عدائي جدا لشخص جمال البنا. رد الفعل ده غالبا بيكون نتيجه لمعلومات مغلوطه عند الناس عن جمال البنا شخصيا أو عن أي رأي قاله زي مثلا مؤخرا الناس كلها كانت متصوره ان جمال البنا بيحلل القبلات بين الجنسين و وصلت الحكايه ان واحد قال لي ان جمال البنا بيحلل الزنا.

مش أحسن حاجه تعملها و انت مخنوق انك تقعد تسترجع في ذكرياتك الحلوه أو الوحشه. تقابل قريبك أو صاحبك اللي اتربيت معاه، كل واحد فينا عنده نسخه من الشخص ده في حياته، إبن خالتك أو عمتك اللي في نفس سنك و كنتوا ساكنين جنب بعض و انتوا عيال و يمكن لغاية دلوقتي أهاليكم لسه ساكنين جنب بعض. هتفتكر لما كنتوا بتلعبوا مع بعض، لما كنتوا هتغرقوا في المصيف، أول واحده ست شفتوها و اتهبلتوا عليها في حياتكم، بنت الجيران اللي برضو كلنا عندنا نسخه منها، إلخ إلخ إلخ....

شخص: يا رب، يا رب انا تعبت من الدنيا و اللي فيها، إرحمني بقى يا رب
الله: ......
شخص: يا رب، يا رب انا عارف انك بتمتحني بس انا مش قادر خلاص. أعمل ايه يا رب دلني
الله: ......
شخص: يا رب، يا رب انت بتقول انك إذا حبيت قوم بتبتليهم، انت ابتليتني كتير أوي يا رب، يعني انت بتحبني؟
الله: ......
شخص: يا رب، يا رب أنا عارف اني غلطت كتير أوي، بس انت رحمتك واسعه، هو انت بتعاقبني يا رب؟
الله: ......
شخص: يا رب، يا رب و الله العظيم ده حرام اللي انت بتعمله في ده، إنت إيه يا أخي؟!
الله: ......
شخص: استغفرك ربي و أتوب إليك، أنا آسف يا رب، كانت ساعة غضب و الشيطان شاطر، سامحني يا رب
الله: ......
شخص: يا رب، طب انت خلقتني ليه طالما انت هتعذبني، انا مش عاوز اعيش كده يا رب، خدني بقى
الله: ......

حاجه غريبه ان ناس مش بالضروره قريبين منك أوي يسيبوا فيك أثر، لسه فاكر لغاية دلوقتي ان خالي أدهم هو أول واحد يصدمني و يستهزأ بحديث و يشكك في مصداقيته، كان عندي عشر سنين تقريبا ساعتها و الخناقه كانت على حديث الذبابه :)

كان بيضحك طول الوقت، حتى و احنا في أي عزا كان بيضحك. زيارته في العيد هو و خالي إيهاب كنت بستنى علشانها العيد علشان اشوفه هو و خالي إيهاب بيناكفوا في بعض و بيهزروا مع بعض. كنت بستنى حكايات اتنين فضلوا اصحاب اكتر من خمسين سنه و كل واحد فيهم و هو بيضحك على التاني و بيحكي عنه.

خالي أدهم مات النهارده الصبح، مات فجأه، تقريبا حتى في موته كان عاوز يصدمنا زي ما كان بيصدمنا بتصرفاته في أوقات غريبه و هو عايش.

الله يرحمه، هيوحشني أوي.

تخيل إن في بدل الكلام ده شتيمه كتير أوي و قرف و زهق و أرق و حيره و تأنيب ضمير و سب لكل الأديان و المقدسات و إهانه لرئيس الجمهوريه و للنخبه المثقفه و للخمسه في الميه اللي بيخدمهم خمسه و تسعين في الميه من مصر و للعامه و الخاصه و لحضرتك و لحضرتي. مخنوق و مش قادر اتكلم و مش عاوز أصلا اتكلم علشان كده التدوينه دي متروكه فارغه لمخيلة القارئ تكملها.

و تصبحوا على خير.

صحيت النهارده على الخبر ده عند حسام الحملاوي. بسبب حلقة برنامج الحقيقه الاسبوع اللي فات عن البهائيه و اللي كان فيها خطاب تحريضي قذر من جمال عبدالرحيم ضد البهائيين تعرض بهائيين من مدينة سهاج لأعمال عنف وصلت لحرق بيوتهم.

مش جديد على جمال عبدالرحيم انه يقدم صوره لأقذر ما يمكن الوصول له من التمييز و اضطهاد الآخر و الكذب و التلفيق و استغلال جهل الناس علشان كده انا مش هقول حاجه ارد بيها عليه لإن فعلا مجادلة الكذابين مضيعه للوقت. لكن خلينا نتكلم عن رد الفعل الإسلامي القويم اللي حصل.

"إن الله يأمر بالعدل و الإحسان و إيتاء ذي القربى و ينهى عن الفحشاء و المنكر و البغي"